Búgin elordada QR Aqparat jáne qoǵamdyq damý ministrliginiń uiymdastyrýymen «QR Tuńǵysh Prezidenti: jasampazdyq pen údemeli damýdyń 30 jyly» atty halyqaralyq jiyn ótip jatyr, dep habarlaidy QazAqparat.
Jiyndy ashqan Aqparat jáne qoǵamdyq damý ministri Aida Balaeva qatysýshylardy QR Tuńǵysh Prezidenti kúni merekesimen quttyqtap, osy merekeniń mańyzyna toqtalyp ótti. Onyń aitýynsha, bul kún - jái mereke emes. Eń aldymen, eldigimiz ben memlekettigimizdiń simvoly, 30 jyldyq turaqtylyq pen beibitshiliktiń biregei kepiline ainalǵan aishyqty kúni. «Óikeni Táýelsizdigimizdiń negizin qalap, egemendigimizdi bekitken elmizdiń Tuńǵysh Prezidenti – Elbasy Nursultan Ábishulynyń tarihi tulǵasy men saiasi qairatkerligi qashan da zor qurmetke ie, Sondyqtan bul mereke Elbasyna degen halyqtyń joǵary iltipatyn, eldiń ystyq yqylasynyń kórinisi dep bilemin. Rasynda da qazaq degen ultty álemge tanytyp, Qazaqstan degen eldi dúnie tórine ozdyrǵan Elbasynyń osy parasatty eńbegi, saliqaly saiasaty. Sodan bolar, bul mereke bir tulǵa emes, tutas ulttyń, Táýelsiz jurttyń ortaq qýanyshy dep nyq senimmen aita alamyz», - dedi ministr A. Balaeva.
Jiyn barysynda Qazaqstannyń birinshi syrtqy ister ministri Tóleýtai Súleimenov ta sóz sóiledy. Ol Elbasy N.Nazarbaevtyń memleketti qalyptastyrý kezeńindegi eren eńbegin atap ótti.
«Qazaqstan úshin qajet kóshbasshy retinde Nursultan Nazarbaevtyń erligi airyqsha boldy. Ol Táýelsiz memleketti qurý jolynda ózine úlken jaýapkershilikti aldy», - dedi T. Súleimenov
.jpeg)