Búgin Astanada ótken keńes barysynda elimizdiń Bas sanitarlyq dárigeri Jandarbek Bekshin Qazaqstandy jáne bútin álemdi alańdatyp otyrǵan tumaýdyń jańa túrleri týraly aitty, dep habarlaidy QazAqparat tilshisi.
«Kóptegen adam tumaýǵa mán bere bermeidi. Esterińizge sala keteiin, barlyq arýlardyń asqynýlaryna 70-80 paiyz jaǵdaida tumaý men jiti respiratorlyq infektsiialar áser etedi. 2009-2010 jyldary H1N1 tumaýy shyqqan kezde ólimmen aiaqtalǵan jaǵdailar boldy. Elimizde 20-dan astam adamnyń ólimi tirkeldi. Byltyr tumaýdan 1 naýqas qaitys boldy. Al biyl bizdi tumaýdyń jańa túrleriniń shyǵýy alańdatady», - dedi ol.
Bas dárigerdiń aitýynsha, tumaýdyń qazirgi ýaqytta taralǵan Michigan, Kolorado syndy túrleri alańdatyp otyr.
«Sebebi jańadan shyǵyp jatqan tumaýlarǵa qarsy adamdardyń immýniteti qalyptasyp úlgermegen. Sondyqtan muny biz baqylaýymyzǵa alyp otyrmyz», - dedi Jandarbek Bekshin.
Onyń sózine qaraǵanda, tumaýdyń taralýy qazan men qarasha ailarynda bastalady. Al sharyqtaý shegi qańtar aiynyń ortasyna týra keledi.
Dúniejúzilik densaýlyq saqtaý uiymynyń usynysy boiynsha 2018-2019 jyldarǵy epidemiologiialyq maýsymǵa jańa vaktsina jetkizildi. Bul reseilik «Grippol+» vaktsinasy. Onyń quramynda tymaýdyń úsh tipi bar. Atap aitqanda, úsh shtamm arasynda A (H1N1) - Michigan, A (H3N2) - Singapýr, V - Kolorado virýstary qamtylǵan.
