Almaty tehnologiialyq ýniversiteti Elbasy N.Á.Nazarbaevtyń «Rýhani jańǵyrý» baǵdarlamasy aiasynda «Jastar jylyna» orai «Bolashaqqa baǵdar» atty Almaty tehnologiialyq ýniversiteti túlekteriniń III forýmyn ótkizdi.
Atalǵan forýmǵa ATÝ-dyń ár jyldardaǵy túlekteri – qazirgi óndiristik kompaniialardyń basshylary, jeke kásipkerler, óner adamdary shaqyryldy. Túlekter forýmyn ótkizýdiń negizgi ideiasy – ýniversitet pen túlekter arasyndaǵy bailanysty nyǵaita otyryp, ýniversitetti ár jyldary bitirgen urpaqtardyń bas qosýy.
Alǵashqy sóz Almaty tehnologiialyq ýniversitetiniń rektory, akademik Talǵat Qulajanovqa berildi. "Oqý ordamyzdyń túlekteri – bizdiń maqtanyshymyz. Osy ýaqytqa deiin biz tehnologiialyq mamandyqtar boiynsha bilikti mamandar daiyndadyq. Olar respýblikamyzdyń ekonomikasyn, áleýetin jaqsartý úshin óz úlesterin qosýda. ATÝ-da bilim alǵan árbir stýdent bilikti maman bolyp, kásibi deńgeige jetip, óz mansabyn jasady. Túlekterimiz respýblikamyzdyń túkpir-túkpirinde qyzmet atqarýda. Biz árbir túlegimizben maqtanamyz!", - dep rektor ATÝ túlekterine jyly lebizin jetkizdi.
Budan keiin ATÝ túlegi, belgili akter, prodiýser Farhad Abdraimov sahnaǵa shyqty. Ol kelgen qonaqtardy quttyqtai otyryp, ózi bilim alǵan oqý ordasyna alǵysyn bildirdi. Kelesi quttyqtaý sóz 2017-jylǵy «Qazaqstan arýy», 2008-jyly «Álem arýy», «Miss Global International - 2011» sulýlyq baiqaýynyń jeńimpazy, ýniversitet túlegi Alfina Nasyrovaǵa berildi. Forýmǵa kelgen qonaqtar men ýniversitet túlekterine rizashylyǵyn bildirgen Alfina Nasyrova Almaty tehnologiialyq ýniversitetinde bilim alǵanyn maqtanysh tutatynyn aitty.
Kelesi bolyp sahnaǵa ATÝ Qamqorshylyq Keńesiniń tóraǵasy, Qazaqstannyń taǵam kásiporyndarynyń vitse-prezidenti, ATÝ túlegi Marina Sabralieva, ATÝ Qamqorshylyq Keńesiniń múshesi, «Bekker i K» JShS konditerlik ónimder jáne nan pisirý óndirisiniń direktory Nasima Qalieva, ATÝ Qamqorshylyq Keńesiniń múshesi, ATÝ professory, Qazaqstannyń jeńil ónerkásip kásiporyndary qaýymdastyǵynyń Prezidenti Liýbov Hýdova shyǵyp, forýmǵa kelgen qonaqtarǵa óz quttyqtaýlaryn jetkizdi. Aita keteiik, ATÝ Qamqorshylyq Keńesi bilim sapasyn arttyrýǵa, sondai-aq, ýniversitet stýdentteri úshin tájiribeden ótýge óz yqpaldaryn tigizip júr.
ATÝ túlegi, ánshi Erlan Orynbasarov stýdenttik shaqtaǵy qyzyqtarymen bólise otyryp, jary Baian Nurmysheva ekeýi ásem ánderimen sharanyń sánin kirgizdi.
Forým barysynda júrgizýshiler qonaqtarǵa ATÝ Qamqorshylyq Keńesiniń bastamasy boiynsha qurylǵan «Endaýment ATÝ» korporativtik qorynyń jumysyn aityp ótti. Qordyń qarjy resýrstary talantty jastardy, ǵylymi zertteýlerdi, áleýmettik jaǵynan osal toptardy qoldaý jáne basqa da mańyzdy maqsattarǵa jumsalady. Osy ýaqytqa deiin qordyń qalyptasýyna eleýli úles qosqan seriktester - «KassanovInvestmentGroup (KIG)» kompaniialarynyń basshysy Ziiatdin Kasanov, «Efes Kazahstan» kompaniiasynyń bas direktory Omer Ýmit, «Bahýs» AQ-nyń bas direktory Anatolii Kiselev jáne Almaty tehnologiialyq ýniversitetiniń oqý-ádistemelik jumystar jónindegi prorektory, tehnika ǵylymdarynyń doktory, professor Liazzat Baibolova. Atalǵan seriktesterge «Endaýment ATÝ» qorynyń atynan «Altyn metsenat» marapaty tabystaldy.
Budan soń sahnaǵa «Endaýment ATÝ» korporativtik qorynyń startap-jobalary men baiqaýlarynyń jeńimpazdary ortaǵa shaqyryldy. Atap aitqanda, Endaýment ATÝ» korporativti qory «Kettik Qazaqstan» startap jobasynyń jeńimpazy, taǵam óndiristeri fakýltetiniń 2018-jylǵy túlegi Nursultan Esirkepov, «ITSolutioncentre» startap jobasynyń jeńimpazy, ininiring jáne aqparattyq tehnologiialar fakýltetiniń túlegi Nurjan Jumahan, «Úzdik stýdent» baiqaýynyń jeńimpazdary taǵam óndiristeri fakýltetiniń stýdenty Islam Gabdýlhali jáne ekonomika jáne biznes fakýltetiniń stýdenti Islam Seithazin ortaǵa shyǵyp, «Endaýment ATÝ» qoryna rizashylyqtaryn bildirdi.
Shara barysynda "Endaýment ATÝ" qory janyndaǵy Túlekter qaýymdastyǵy men Qamqorshylyq keńesiniń bastamasymen Rodik Gaikovich Mnatsakanian atyndaǵy maqsatty kapital ashylǵandyǵy týraly qonaqtarǵa habarlandy. Kelesi bolyp sahnaǵa Armeniia Respýblikasynyń Almaty qalasyndaǵy konsýlynyń kómekshisi Aram Navasardian shyǵyp, qonaqtarǵa quttyqtaýyn jetkizdi.
Shara barysynda ýniversitettiń talantty stýdentteri án jáne bi ónerlerin ortaǵa saldy. Ýniversitet stýdentterinen qurylǵan «Tumar» bi ansambli de myń buralǵan bilerimen kórermenniń yqylasyna bólendi.
Sondai-aq, forým aiasynda «Óz jolyńdy tańda!» atty túlekter jármeńkesi ótti. Jyl saiyn ótetin ATÝ túlekteriniń jármeńkesi – ýniversitet pen jumys berýshiler arasyndaǵy yntymaqtastyqtyń tiimdi túrine ainalyp keledi. Jármeńkeniń negizgi maqsaty – túlekter men jumys berýshilerdi kezdestirý.
Forým ATÝ stýdentterinen quralǵan vokal úiirmesiniń qatysýshylarynyń oryndaýyndaǵy «Atameken» ánimen aiaqtaldy. Kelgen qonaqtar men túlekter forýmnan kóńilderi kóterińki kúide tarady.
