QR BǴM mektep bitirý keshin qymbat sharaǵa ainaldyrmai, mektep qabyrǵasynda ótkizýdi usynady, dep habarlaidy "Ult aqparat" ministrliktiń baspasóz qyzmetine silteme jasap.
Oqý jylynyń aiaqtalýyna orai, oqýshylar men ata-analardy mektep bitirý keshin ótkizýdiń formaty alańdatady. Sonymen qatar, ata-analar komitetiniń aqsha jinaityndyǵy týraly habarlama jii túsedi. Ol kóptegen ata-ana úshin otbasylyq biýdjetke salmaq salatyny anyq.
Mundai habarlamalarǵa jaýap retinde QR Bilim jáne ǵylym ministrligi óz tarapynan mektep bitirý keshin aqshany únemdeý úshin kafe, restorandarda emes, mektep qabyrǵasynda ótkizýdi usyndy. Sondai-aq, ministrlik mektep bitirý keshiniń maqsatyn sándi kiimder men mol dastarhandy kórsetý emes, shyn júrekten, jaqsy uiymdastyrylǵan shara retinde balalardyń, muǵalimder men ata-analardyń esinde qalarlyq mektepishilik jiyn dep esepteidi.
Mektep bitirý keshiniń formaty qymbat ári sán-saltanatqa toly kesh bolmaýy kerek. Jyldar boiy tulǵany qalyptastyrýda talmai eńbek etken pedagogtar men ata-analar jáne búgin mektep qabyrǵasynan túlep ushyp, úlken ómirge qadam basyp jatqan keshtiń basty keiipkerleri - túlekter arasyndaǵy jyly dialog túrinde ótkeni abzal.
Atalǵan keshte oqýda ozat, jetistikke jetken, mektep, aýdan, qala, oblys, respýblikalyq, halyqaralyq deńgeidegi sporttyq, intellektýaldyq jarystarda jeńimpaz bolǵan, mekteptiń qoǵamdyq ómirine belsendi atsalysqan balalardy qurmetpen atap ótý – oryndy.
Túlekter mektep bitirý keshin pedagogtardyń kómegimen kreativti baǵdarlama daiyndap, ata-analaryna, súiikti ustazdaryna jáne janyna jaqyn synyptastaryna alǵystaryn bildiretin maǵynaly ári qyzyqty formatta uiymdastyrýyna bolady.
