2018 jyldyń qorytyndysy boiynsha Turǵyn úi qurylys jinaq bankiniń («Báiterek» holdinginiń enshiles uiymy) 1 038 869 salymshysyna memleket syilyqaqysy tólendi. Qarjylyq uiym klientteriniń shotyna jalpy alǵanda 28,6 milliard teńge aýdaryldy. Bul ótken jylǵy bank salymshylaryna tólengen qarajattan 5,6 mlrd teńgege artyq.
Memleket syilyqaqysyn tóleýge arnalǵan somanyń ulǵaiýy bank klientteri sanynyń ósýine bailanysty bolyp otyr. Máselen, ótken jyly 20% kólemindegi syilyqaqy 896 620 adamǵa berilgen edi.
Al, 96 200 teńgeni quraityn eń joǵarǵy memleket syilyqaqysyn 202 900 bank klienti aldy. Iaǵni, atalǵan azamattar 2018 jyly shottaryna keminde 481 000 teńgeni nemese 200 ailyq eseptik kórsetkishti quraityn qarajat somasyn jinaǵan. Depozitinde budan da úlken qarajat somasyn jinaǵan klientter syilyqaqy tólenbegen jinaq somasy boiynsha memlekettik bonýsty 2019 jyldyń nátijesinde alatyn bolady.
- Turǵyn úi qurylys jinaq banki – turǵyn úi qurylys jinaq júiesin júzege asyratyn Qazaqstandaǵy jalǵyz bank. Zań boiynsha bul júiege qatysýshylarǵa arnap memleket jyl saiyn syilyqaqy tóleidi. Atalǵan bonýs qazaqstandyqtardyń óz baspanasyn satyp alýlary úshin tezirek qarajat jinaqtap, qonys toiyn ótkizýge múmkindik beredi. Qoljetimdi sharttar boiynsha páter nemese úi satyp alý úshin turǵyn úi qurylys jinaq júiesine qatysýǵa niet bildirýshiler sany jyldan jylǵa artýda. 2018 jyldyń qorytyndysy boiynsha memleket 1 millionnan astam qazaqstandyqtyń jinaq somasyn kóbeitýge kómegin tigizdi. Salystyra keter bolsaq, osydan úsh jyl buryn memleket syilyqaqysy budan eki ese az adamǵa, iaǵni, 537 myń salymshyǵa tólengen bolatyn,- dep atap ótti Turǵyn úi qurylys jinaq banki basqarma tóraiymy Lázzat Ibragimova.
2019 jyldyń qorytyndysy boiynsha memleket syilyqaqysy beriletin eń joǵarǵy salym somasy – 505 000 teńge (200 AEK) . Osyǵan sáikes, maksimal memleket syilyqaqysy 101 000 teńgeni quraidy. Jyl qorytyndysy boiynsha atalǵan somany alý úshin bank salymshylaryna ai saiyn depozitterine orta eseppen 42 000 teńgeden salyp otyrý kerek.
Al Turǵyn úi qurylys jinaq banki klienti kóbirek qarajat somasyn jinaǵysy kelse, eń joǵarǵy mólsherdegi kiriske qol jetkizý úshin otbasy músheleriniń atyna birneshe depozit ashyp, olarǵa qarajatty teńdei bólip, salyp otyra alady. Bul jaǵdaida memleket syilyqaqysy ashylǵan ár shot boiynsha tólenedi. Al turǵyn úi zaemyn alýǵa qajet soma jinalǵan kezde, shottardy biriktirip, baspana satyp alýǵa bolady. Bul optsiiany Turǵyn úi qurylys jinaq bankinde «Otbasylyq paket» dep ataidy.
Turǵyn úi qurylys jinaq banki depoziti bank syiaqysy men memleket syilyqaqysynyń arqasynda eń tabysty salymdardyń biri bolyp sanalady. Depozit boiynsha jyldyq tiimdi syiaqy mólsherlemesi 13%-ǵa deiin barady.
