Turǵyn úi qurylys jinaq banki biyl áskeri qyzmetkerlerge arnalǵan turǵyn úi baǵdarlamasyn sátti túrde júzege asyrdy. Jańartylǵan sharttar boiynsha, bul baǵdarlama 2 mamyrda bastalyp, 27 mamyrda merziminen buryn aiaqtaldy. 19 jumys kúni ishinde 10,7 mlrd teńge somasyna 680 zaem berildi. Sondai-aq, 46,7 mlrd teńge somasyna taǵy 3 143 nesielik ótinim qabyldandy. Atalǵan ótinimder qarastyrylǵannan keiin, olar boiynsha nesie berile bastaidy.
Osylaisha, áskeri qyzmetkerlerdi nesielendirýge bólingen qarajattyń jyldyq limiti tolyqtai igerildi. «Áskeri baspana» turǵyn úi baǵdarlamasyn júzege asyrýdyń úshinshi kezeńi 2020 jyldyń qańtar aiynda bastalady.
Esterińizge sala ketsek, atalǵan baǵdarlama sheńberinde zaemdy 15 paiyz bastapqy jarnamen jáne jyldyq 8 paiyz mólsherlememen alýǵa bolady.
Zaemdy alý úshin, áskeri qyzmetkerlerdiń 2018 jyldaǵy sekildi konkýrsqa qatysyp, onyń nátijesin kútýleri qajet emes. Olar tek ózdiginen kerek páterdi taýyp, bankke habarlasýyna bolady. Sondai-aq, turǵyn úidi tańdaýǵa esh shekteý qoiylmaidy. Daiyn páterdi jańa salynǵan úiden ne qaitalama naryqtan tańdap alýǵa, sondai-aq, úlestik qurylysqa qatysýǵa nemese jeke turǵyn úidi jer telimimen qosa satyp alýǵa bolady.
- «Áskeri ónim» – banktiń jeke bastamasy. Bul baǵdarlamany áskeri qyzmetkerlerdiń óte tiimdi sharttar boiynsha óz baspanasyna qol jetkizýine kómek kórsetý maqsatynda daiyndap, iske qostyq. Arnaiy osy úshin Turǵyn úi qurylys jinaq banki ótken jyly 98 mlrd teńge qarajat bóldi. Olardyń 48 mlrd teńgesi – banktiń óz qarajaty, al 50 mlrd teńgesi – qaryzǵa alynǵan aqsha. Osylaisha, 2018 jyldyń qorytyndysy boiynsha biz 2 556 áskeri qyzmetkerge 38,5 mlrd teńge somasyna zaem berip, olardyń óz baspanalaryna qol jetkizýine qol ushyn berdik. Biyl áskeri qyzmetkerlerdi nesielendirý úshin 60 mlrd teńge qaldy. Bul soma shamamen taǵy 4 000 áskeridiń turǵyn úi jaǵdaiyn jaqsartýǵa jetedi. Shamamen 70 000 áskeri qyzmetkerdiń baspanaǵa muqtaj ekendigin eskere otyryp, eki jylǵa tolmaityn ýaqyt ishinde bank olardyń 10%-na turǵyn úi máselesin sheshýge kómektesti, - dep atap ótti Turǵyn úi qurylys jinaq bankiniń Basqarma Tóraiymy Lázzat Ibragimova.
Osy jyly eń kóp zaem Nur-Sultan qalasy (28.05.19 j. málimetter boiynsha 294 zaem berildi), ShQO (28.05.19 j. málimetter boiynsha 99 zaem berildi) jáne Semei qalasynda (28.05.19 j. málimetter boiynsha 77 zaem berildi) berildi.
«Áskeri baspana» baǵdarlamasy júzege asyrylǵan sońǵy kúni Semei qalasynda turatyn Gúlnáz Saqpanbaevaǵa nesie berildi. Shekara áskerleri aǵa serjanty óziniń 3 bólmeli páterin qaitalama naryqta 13 mln. teńgege satyp aldy. Zaem somasy 13 jyldy quraidy. Nesieni óteýge kómek kórsetý úshin memleket Gúlnázǵa turǵyn úi tólemderin tóleitin bolady.
- Ótken jyly qyzmet merzimine bailanysty turǵyn úi baǵdarlamasyna qatysa almadyq. Biyl «áskeri ónim» sharttary jańartyldy. Sol sebepti otbasymyzben onyń bastalýyn asyǵa kúttik. Biz aldyn-ala yńǵaily páterdi izdestirip, jumys ornynan qajetti qujattardy jinastyra bastadyq. Olardy óz merziminde ótkizip, oń sheshim shyǵýyn kúttik. Al endi mine jubaiym jáne 2 balamyzben birge ózimizdiń keń baspanamyzǵa kóshýge daiyndalyp jatyrmyz, - dedi Gúlnáz Saqpanbaeva.
Turǵyn úi qurylys jinaq bankiniń málimeti boiynsha, «Áskeri ónim» turǵyn úi sharttaryn jaqsartýǵa baǵyttalǵan banktiń kóptegen quraldarynyń biri ǵana. Áskeriler, sondai-aq, óz páterlerin «Nurly jer» baǵdarlamasy boiynsha satyp alýlaryna bolady. Bul baǵdarlamaǵa qatysý úshin banktegi shotta 20 paiyz kóleminde bastapqy jarnanyń bolýy tiis. Sol jaǵdaida nesieni jyldyq 5 paiyz mólsherlememen alýǵa bolady. Turǵyn úiler men olar boiynsha ótinish qabyldaý merzimi jaily aqparat baspana.kz jariialanǵan.
Atalǵan kezeńde áskeri qyzmetkerlerdiń úshten biri aldaǵy ýaqytta turǵyn úi zaemyn alý úshin Turǵyn úi qurylys jinaq bankindegi shotynda óz turǵyn úi tólemderin jinaqtaýdy qolǵa alǵan. Bul zaem túri jyldyq 3,5-ten 5 paiyzǵa deiingi mólsherlememen beriledi. Ony alý úshin, depozitte úi baǵasynyń 50 paiyzyn jinaý qajet.
