QR Premer-Ministri Álihan Smaiylovtyń tóraǵalyǵymen ótken Úkimet otyrysynda Memleket basshysynyń 2022 jylǵy 8 aqpanda Úkimettiń keńeitilgen otyrysynda bergen tapsyrmalaryn iske asyrý sharalary qaraldy. Sýbsidiia alýshylarǵa qatysty qandai qarsy mindettemelerdi engizý kózdelip otyrǵany jáne osy mindettemelerdiń oryndalý deńgeiiniń qalai baqylanatyny týraly aýyl sharýashylyǵy ministri Erbol Qarashókeev aityp berdi.
Ministrdiń aitýynsha, búgingi tańda sýbsidiia alýshylar úshin qandai da bir qarsy mindettemeler qoiylmaidy, sol sebepti sýbsidiialardy paidalaný barysynda tiimdiligi úshin jaýapkershilik tómen bolyp qalyp otyr. Sondyqtan sýbsidiia men jeńildikti nesie alýshylar úshin qarsy mindettemeler alý normasy engiziletin bolady. Olar alynǵan qarajattyń maqsatty paidalanylýyn qamtamasyz etýi tiis. Bul naqty indikatorlar arqyly baǵalanady.
«Mysaly, barlyq sýbsidiia alýshylar úshin óndiris kólemin tómendetpeý kózdelýde. Mal sharýashylyǵynda – bul jyl saiyn mal basyn keminde 5%-ǵa ulǵaitý, 100 analyqtan keminde 80 bas tól alý. Alynǵan tóldiń sapasyn baqylaý úshin DNQ-taldaý arqyly tóldiń ákelik tegin anyqtaý normasy engiziletin bolady», — dedi ministr.
Al ósimdik sharýashylyǵy boiynsha tuqym sharýashylyǵy egistikteriniń úles salmaǵynyń egistikterdiń 15%-ynan kem bolmaý mindettemesi engiziledi.
Budan basqa, investitsiialyq sýbsidiialaý kezinde fermerler nysannyń jobanyń biznes-josparynda kórsetilgen merzimde paidalanýǵa berilýin, onyń jobalyq qýatyna ýaqytyly qol jetkizilýin qamtamasyz etýi tiis.
«Atalǵan normalardyń barlyǵy arnaiy qurylǵan jumys tobynda talqylanyp, maquldanǵan soń engiziledi», — dedi E. Qarashókeev.
Bul rette qarsy mindettemelerdiń oryndalýyn baqylaý protsesi adamnyń qatysýynsyz, tsifrlyq tehnologiialar negizinde sýbsidiialaýdyń jańa biryńǵai memlekettik aqparattyq júiesinde avtomattandyrylǵan túrde engiziletin bolady.
