Memlekettik tildi bilmeitin azamattardy aýylǵa jiberý kerek. Olar birligi jarasqan eldi mekennen tájiribe almasyp, ári sondaǵy ata-apalarymyzdan qazaq tilinde sóileýdi úirenip qaitar edi. Mundai pikirdi Almaty oblysynyń Qapal aýyldyq okrýgi ákimi apparatynyń bas mamany Vladimir Chepel aitty, dep habarlaidy QazAqparat.
«Aýyldy jerde qazaq tilin bári biledi jáne til deńgeiine bailanysty eshqandai másele joq. Al qalaǵa kelseń, munda másele bar ekenin kóresiń. Qalada jastar qazaqsha sóilespeidi. Memlekettik tildi bilmeitin azamattardy aýylǵa jiberý kerek. Tájiribe almasyp, ári sondaǵy ata-apalarymyzdan qazaqsha sóileýdi úirenip qaitar edi. Bul máseleni biz etno-aýyl formatynda pysyqtai alamyz. Iaǵni, týrizmniń osy formatynyń salasy arqyly memlekettik tildi oqytý múmkindigi bar. Qazir QHA janynan memlekettik tildi oqytý boiynsha kóptegen tegin ortalyqtar ashyldy. Azamattarǵa eń bastysy sóilei bastaýǵa uialýdy toqtatý kerek»,– deidi Vladimir Chepel.
Sonymen qatar, ol Elbasynyń tóraǵalyǵymen ótken keńeste kóterilgen máselelerge toqtaldy.
«Keńes otyrysynda memlekettik tildi oqytý, azamattardyń Qazaqstan Respýblikasynan basqa memleketterge qonys aýdarý máselesi qozǵaldy. Meniń oiymsha, Qazaqstanda turatyn árbir azamat memlekettik tildi bilýge mindetti. Memleket basshysy Qasym-Jomart Toqaev qoǵamdyq kelisimdi saqtap, tatýlyǵymyzdy arttyrýda memlekettik tildiń róline airyqsha mán berý qajettigin aitqan bolatyn. Osy tusta etnosaralyq birlikti saqtaýda memlekettik tildi bilý úlken ról atqarady dep oilaimyn»,– deidi ol.
Qazaq tilin jetik meńgergen memlekettik qyzmetker jumysta tek qazaq tilinde sóileitinin aitty.
«Men – memlekettik qyzmetshimin. Altyn besigimiz aýylda turǵandyqtan, ártúrli suraqtarmen kelgen qandastarymyzdyń máselesin eshbir qiyndyqsyz túsinip, birden kómektesýge tyrysamyn. Qazaq tilin bilgendikten, ashyq-jarqyn áńgimelesip, erkin pikir almasamyz. Kindik qanym tamǵan týǵan jerimniń ár tóbesin, eldiń salt-dástúrin, tarihyn jaqsy bilemin. Keibir tiiskisi kelip turatyn buzyqtaý jigitterge «Baýyrym, tynyshtyq pa?»,– dep jaýap bersem, olar birden óz railarynan qaityp qalady»,– deidi Vladimir.
Vladimir Chepel qazaqstandyqtardy tatýlyqty baǵalaýǵa shaqyrdy.
«Keńeste men ózim úshin jańa nárse taptym. Bizdiń azamattar úshin erteńgi kúnge degen senim. Biz qalyptasýdyń úlken jolynan óttik. Alda jańa maqsattar men mindetter tur. Osy sátti paidalanyp, barlyq zamandastarymdy, búkil Otandastarymyzdy tatýlyǵymyzdy baǵalaýǵa jáne birigip jumys atqarýǵa shaqyramyn»,– dep qortyndylady memlekettik qyzmetker.
.jpeg)