Qazaqstan densaýlyq saqtaý ministri Aleksei Tsoi 10 shildedegi úkimet otyrysynda 1-8 shilde aralyǵyndaǵy aptada elde aýrý belgileri koronavirýstikine uqsaityn biraq “naqtylanbaǵan” 39 702 myń pnevmoniia jaǵdaiy tirkeldi dedi. Sheneýnik bul osy aýrýǵa shaldyqqan naýqastardyń jartysynda PTR nátijesi teris shyqty dep málimdedi.
Ministrdiń sózinshe, biylǵy maýsymda pnevmoniiadan qaitys bolǵandar sany byltyrǵy kórsetkishten 2,3 ese ósip 628-ge jetti. Byltyrǵy maýsymda bul aýrýdan 274 adam kóz jumǵan bolatyn. Sonymen qatar 2020 jyldyń alǵashqy alty aiynda pnevmoniiaǵa shaldyqqandar 55,4 paiyzǵa artyp, 98 546-ǵa jetken. Byltyr dál osy merzimde 63 436 jaǵdai tirkelgen.
Tsoi elde koronavirýstan resmi 313 adam qaitys bolǵanyn aitty.
Densaýlyq saqtaý ministrligi tek jaqyn arada ǵana aýrý belgileri koronavirýstikine uqsaityn PTR nátijesi teris pnevmoniia jaǵdailaryn “koronavirýs infektsiiasy juqtyrý bolýy múmkin” dep jiktei bastady. COVID-19 resmi statistikasyna bul málimetter qosylyp jatqan joq. Sondai-aq kei jaǵdaida resmi COVID-19 ólimine koronavirýs juqtyryp qaitys bolǵandar da kirmei jatyr. Arnaiy komissiia qaitys bolǵandardan koronavirýs anyqtalsa da, ólimniń sebebi ózge aýrý dep anyqtap jatyr. Sonymen qatar densaýlyq saqtaý ministrligi maýsymnyń sońynan bastap COVID-19 ólimin aptasyna bir ret habarlaýǵa kóshti.
Keibir ekspertter bul ádisti synǵa aldy. Olardyń aitýynsha, bilik osy arqyly epidemiianyń aýqymyn jasyrǵysy keledi.
Qazaqstanda “koronavirýstik emes” pnevmoniia tarap jatyr degen habar taraǵan soń, Qytai elshiligi 9 shilde kúni óz azamattaryna Qazaqstanda “COVID-19 aýrýynan da qaýipti” respiratorlyq aýrý bar dep málimdep, saq júrýge shaqyrdy. Bul málimdeme halyqaralyq qaýymdastyqtyń nazaryn aýdaryp, densaýlyq saqtaý ministrligi aqparatty joqqa shyǵarýǵa májbúr boldy. Ministrlik “kei buqaralyq aqparat quraldaryndaǵy” habarlamany “shyndyqqa sai emes” dedi, biraq Qytai elshiligi týraly sóz aitpady.
Resmi túrde Qazaqstanda koronavirýs infektsiiasyn 54 747 adam juqtyrǵan. COVID-19 ólimi ret sońǵy ret 7 shilde kúni habarlanǵan edi. Ol kezde kóz jumǵandar 264 adamǵa jetkeni aitylǵan. Tsoidyń keshegi úkimet otyrysyndaǵy sózinen 8 shildeden beri kemi 49 adamnyń kóz jumǵany belgili boldy. Tsoi sondai-aq 2020 jyldyń alǵashqy alty aiynda pnevmoniiadan 1772 adamnyń, tek maýsymda 628 adamnyń qaitys bolǵanyn aitty. Biraq olardyń arasynda “koronavirýs” juqtyrǵany qansha ekenin ministr naqtylamady.
