Foto: Akorda.kz
Memleket basshysy Ulttyq bank tóraǵasy Ǵalymjan Pirmatovty qabyldady, - dep habarlaidy "Ult aqparat" Aqorda saityna silteme jasap.
Prezidentke Ulttyq banktiń biylǵy qańtar-qarasha ailaryndaǵy aqsha-kredit saiasatynyń aldyn ala qorytyndylary týraly esep berildi.
Qasym-Jomart Toqaevqa syrtqy jáne ishki naryqtardaǵy ahýal, infliatsiianyń ósý qarqyny men onyń boljamy, sondai-aq altyn-valiýta rezervteriniń jai-kúii jóninde baiandaldy.
Kezdesý barysynda Ulttyq banktiń qabyldaǵan sharalary teńgelei salynǵan depozitterdiń buryn-sońdy bolmaǵan deńgeige deiin ósýine, valiýta naryǵyn turaqtandyrýǵa jáne ekonomikany kreditteý ósimin jalǵastyrýǵa oń yqpal etkeni atap ótildi.
Prezidentke tsifrlyq teńgeni engizý qajettigine qatysty júrgizilgen zertteý qorytyndylary baiandaldy. Ǵalymjan Pirmatovtyń aitýynsha, naryq qatysýshylary, naqty tutynýshylar men saýda-servistik kásiporyndarynyń qatysýymen ótken tsifrlyq teńge platformasyn testileý sátti boldy. Tsifrlyq teńgeniń engizilýi qolma-qol aqshasyz tólemniń qoljetimdiligin arttyryp, memlekettik shyǵyndardyń ashyqtyǵyn qamtamasyz etedi jáne innovatsiialyq qarjy ónimderin jasaýǵa múmkindik beredi. Ulttyq bank tóraǵasy tsifrlyq teńge 2025 jyldyń sońyna deiin qoldanysqa engiziletinin jetkizdi. Tsifrlyq teńgeni ainalymǵa engizý jospary úsh kezeńnen turady. Memleket basshysy jobany odan ári júzege asyrý jóninde mindet júktedi.
Kezdesý sońynda Qasym-Jomart Toqaev aqsha-kredit saiasatyn tiimdi iske asyrýǵa baǵyttalǵan birqatar naqty tapsyrma berdi.
