Foto: Bas kólik prokýratýrasy
Trassalardy durys kútip-ustamaǵany úshin jol qyzmetshileri jumystan shyǵaryldy, dep habarlaidy «Ult aqparat» Bas kólik prokýratýrasynyń baspasóz qyzmetine silteme jasap.
Kólik prokýratýrasy organdary qys mezgilinde halyqaralyq jáne respýblikalyq mańyzy bar avtomobil joldaryn kútip-ustaý jónindegi ýákiletti organdar men uiymdardyń qyzmetin turaqty baqylaidy.
Qadaǵalaý is-sharalary barysynda joldy kútip-ustaýǵa jaýapty mekemeler óz qyzmetterin tiisti deńgeide atqarmaǵany anyqtaldy.
Máselen, Soltústik Qazaqstan kólik prokýratýrasy "QazAvtoJol" UK" AQ jáne "Qajservis" JShS aýmaqtyq filialdarynda qar tazalaý tehnikasy men kóktaiǵaqqa qarsy materialdardyń tapshylyǵyn anyqtady.
Temperatýranyń kúrt ózgerýi men qardyń túsýi kezindegi bul jaǵdai Soltústik Qazaqstan oblysynyń respýblikalyq joldaryndaǵy jol qozǵalysyn qiyndatyp, júrgizýshilerge qaýip tóndirdi.
Shymkent kólik prokýratýrasy da tekseris júrgizdi. Nátijesinde Túrkistan oblysynyń respýblikalyq joldaryn kútip ustaý úshin jol tehnikasynyń az ekenin anyqtaǵan. Nátijesinde, ótken jyldyń 12-15 jeltoqsany aralyǵynda qarly boran men qar jaýǵan kezde keshiktirilgen tazalaý jumystary "Shymkent-Taraz" baǵyty boiynsha kólik aǵynyn toqtatyp, 50-ge jýyq avtokólik jolda "turyp qaldy".
Anyqtalǵan buzýshylyqtardy joiý úshin prokýratýra avtomobil joldaryn basqarý jónindegi ulttyq operatorǵa usynymdar joldady.
Prokýratýranyń qadaǵalaý aktileriniń biri boiynsha laýazymdyq mindetterin tiisinshe oryndamaǵany úshin 11 qyzmetkerimen jáne "Qajservis" JShS Soltústik Qazaqstan oblystyq filialynyń direktorymen eńbek sharttary buzyldy. Taǵy bireýi boiynsha – qyzmet kórsetetin merdigerlerge 1,6 mln teńgeden astam somaǵa aiyppul salyndy, - delingen habarlamada.
Sonymen qatar kólik prokýrorlarynyń tekserisinen keiin "QazAvtoJol" UK" AQ qosymsha 245 jol tehnikasyn satyp alatyn boldy. Aldaǵy ýaqytta el óńirlerine taratylady.
