«Ádilet» partiiasy fraktsiiasynyń múshesi, Quryltai depýtaty Aijan Aimaǵanova Ishki ister ministri Erjan Sádenovke depýtattyq saýal joldap, turmystyq zorlyq-zombylyqtyń aldyn alý úshin «Elektrondyq qorǵanys aimaǵy» pilottyq jobasyn engizýdi usyndy, dep habarlaidy ult.kz.
Depýtattyń aitýynsha, sońǵy jyldary Qazaqstanda áielder men balalardy zorlyq-zombylyqtan qorǵaý baǵytynda birqatar shara qabyldanyp, jaýapkershilik kúsheitilgen. Alaida qaiǵyly oqiǵalar áli de jalǵasyp keledi.
Ol sońǵy ailarda qoǵamdy dúr silkindirgen eki jaǵdaidy mysalǵa keltirdi. 13 shildede Abai oblysynda 20 jastaǵy Dilnaz Jumaǵulova pyshaq jaraqattarynan qaza tapsa, 23 qyrkúiekte Astanada eki balanyń anasy Jazira Adaýaovany burynǵy jubaiy óltirgen.
Osyǵan bailanysty depýtat qoldanystaǵy qorǵaý tetikteri zorlyq-zombylyq bolǵannan keiin ǵana áreket etpei, qaýipti aldyn ala anyqtap, onyń jolyn kesýge múmkindik berýi kerek ekenin atap ótti.
Aijan Aimaǵanova qandai usynystar aitty?
Depýtat Ishki ister ministrligine úsh usynys joldady:
- «Elektrondyq qorǵanys aimaǵy» pilottyq jobasy. Jobany jekelegen óńirlerde ázirlep, synaqtan ótkizý;
- Biryńǵai algoritm engizý. Qaýip týraly belgi túsken kezde politsiia qandai sharalar qabyldaýy kerektigin naqty aiqyndaý;
- Tsifrlyq tirkeý júiesin qoldaný. Árbir qaýip signaly men oǵan bailanysty qabyldanǵan sharalardy avtomatty túrde tirkep, kimniń, qashan jáne qandai áreket jasaǵanyn baqylaý.
Depýtattyń pikirinshe, bul úshin jańa ári qymbat aqparattyq júie qurýdyń qajeti joq. Qazaqstanda profilaktikalyq esepke alý men elektrondyq baqylaýdyń qajetti tetikteri bar.
Aijan Aimaǵanova qolda bar quqyqtyq jáne tsifrlyq múmkindikterdi tiimdi paidalaný arqyly qaýipti jaǵdailardy der kezinde anyqtap, adam ómiri men qaýipsizdigin qorǵaýǵa shaqyrdy.
