Qyzylordada kontsert bergen ánshi Qairat Nurtas sahnaǵa shaǵyn sómke laqtyrǵan kórermenge eskertý aitty, dep habarlaidy ult.kz.

Oqiǵa óner iesi án oryndap turǵan kezde bolǵan. Zalda otyrǵan kórermenderdiń biri sahnaǵa shaǵyn sómke laqtyrǵan. Ánshi óner kórsetýin jalǵastyryp, týyndysyn aiaqtaǵannan keiin osy jaǵdaiǵa nazar aýdardy.

Qairat Nurtas sómkeni iesine qaitaryp, mundai árekettiń orynsyz ekenin jetkizdi.

"Úitip laqtyrma, baýyrym, kórgensizdik bolady", - dedi ánshi.

Kórermenniń sómkeni sahnaǵa ne úshin laqtyrǵany belgisiz. Óner iesi oǵan zatyn qaitaryp berip, eskertý jasaýmen shekteldi.

Aita keteiik, Gúlzira Aidarbekova júrek tebirenter jazba jariialady.

Shymkenttegi kontserttiń mán-jaiy
 

Qairat Nurtastyń Shymkenttegi kontsertinde adam kóp jinalyp, kórermender qysylyp qalǵan. Oqiǵa 2026 jylǵy 10 qazanda Qajymuqan Muńaitpasov atyndaǵy stadionda bolǵan.

Qalalyq densaýlyq saqtaý basqarmasynyń málimetinshe, 8 adam meditsinalyq kómekke júgingen. Jeteýi tekserýden keiin úiine jiberilip, jaraqat alǵan 18 jastaǵy qyz aýrýhanaǵa jatqyzylǵan. 11 qazandaǵy málimette onyń jaǵdaiy aýyr, biraq turaqty dep baǵalanǵan.

Politsiianyń aldyn ala deregine sáikes, alańnyń syiymdylyǵynan artyq bilet satylǵan. Qaýipsizdik talaptaryna sai kelmeitin qyzmet kórsetý deregi boiynsha qylmystyq is qozǵalyp, kontsertti uiymdastyrýshy ustalǵan. Adamdar qaitys boldy degen aqparatty politsiia joqqa shyǵarǵan.