Qytai men Úndistan azamattary úshin 72 saǵattyq vizasyz tártip endi Qazaqstannyń alty qalasynyń áýejailaryna engizildi, dep habarlaidy "Ult aqparat".
Memleket basshysynyń elimizdiń tranzittik áleýetin arttyrý, «Astana» Halyqaralyq qarjy ortalyǵynyń kóliktik qoljetimdiligin qamtamasyz etý jónindegi tapsyrmalaryn oryndaý maqsatynda QR Úkimetiniń qaýlysymen Qazaqstan Respýblikasyna kelýdiń, bolýdyń jáne ketýdiń erejesine ózgerister engizildi. Oǵan sáikes, atalmysh tranzittik tártip aiasynda jumys isteitin halyqaralyq áýejailardyń tizimi 4 qalanyń áýejailarymen tolyqtyryldy. Nur-Sultan jáne Almaty áýejailarynyń qataryna endi Shymkent, Aqtaý, Qaraǵandy jáne Taraz qalalarynyń áýejailary qosyldy.
Budan bólek, atalmysh rejimniń kúshi barlyq áýe kompaniialardyń (qazaqstandyq jáne sheteldik) jolaýshylaryna taratylatyn bolady.
Aita keteiik, Qytai jáne Úndistan azamattary úshin buǵan deiin engizilgen Qazaqstan Respýblikasyna kelýdiń, bolýdyń jáne ketýdiń 72 saǵattyq vizasyz tártibi 2020 jylǵy 31 jeltoqsan, saǵat 23.59-ǵa deiin qoldanysta bolady.
Osylaisha, Nur-Sultan, Almaty, Shymkent, Aqtaý, Qaraǵandy, Taraz áýejailary arqyly qazaqstandyq jáne sheteldik áýe kompaniialarmen saiahattaityn QHR jáne Úndistan elderiniń tranzittik azamattary Qazaqstan Respýblikasynyń aýmaǵynda 72 saǵattyq vizasyz rejimdi qoldana alady.
«Jedel málimetke sáikes, Qazaqstan Respýblikasy arqyly ótetin áýe kóligimen saiahattaǵan tranzittik jolaýshylar aǵyny 2019 jyly 1 mln jolaýshydan asty. 2018 jylmen salystyrǵanda ósim shamamen 11% qurady. Engizilgen tolyqtyrýlar Qazaqstan Respýblikasy arqyly tranzittik jolaýshylar sanynyń artýyna yqpal etetin bolady», - delingen QR Indýstriia jáne infraqurylymdyq damý ministrliginiń málimetinde.
