Qazaqstan men Túrkiia prezidentteri eki eldiń Joǵary deńgeidegi strategiialyq yntymaqtastyq keńesiniń IV otyrysyn ótkizdi, dep habarlaidy "Ult aqparat" Aqordanyń resmi saityna silteme jasap.
Memleket basshysy Rejep Taiip Erdoǵanǵa iltipat bildire otyryp, Túrkiia Prezidenti bastaǵan delegatsiianyń elimizge memlekettik saparmen kelgenine rizashylyǵyn jetkizdi.
Aldyn-ala bekitilgen kún tártibine sáikes, jiynda syrtqy saiasat jáne investitsiia salasyndaǵy is-áreket, saýda-ekonomikalyq yntymaqtastyq, kólik-logistika jáne áskeri óndiris salasyndaǵy yqpaldastyq, energetika salasyndaǵy bailanystar jáne aýyl sharýashylyǵy salasyndaǵy yntymaqtastyq sekildi 5 másele talqylandy.
Sonymen qatar jiynda eki el arasyndaǵy saýda-ekonomikalyq jáne investitsiialyq yntymaqtastyq qarqyndy damyp kele jatqany jaily aityldy.
– Maqsatymyz – saýda ainalymyn 10 milliard dollarǵa jetkizý. Ankara sońǵy 15 jylda Qazaqstanǵa 4,35 milliard dollar investitsiia quidy. Al bizdiń elimiz Túrkiiaǵa 1,13 milliard dollar qarjy saldy. Túrkiia Qazaqstannyń eń iri 10 investorynyń qatarynda tur. Jalpy, ekijaqty saýda-sattyq áleýetin arttyrý jolynda tranzittik tasymal baǵyttary mańyzdy ról atqarady. Biz tasymal shyǵynyn azaityp, jetkizý merzimin qysqartý úshin Transkaspii dálizin damytýǵa shaqyramyz. Búgingi kezdesýde biz ony talqyladyq. Kózqarasymyz birdei. Biyl maýsym aiynda Bakýde úshjaqty formattaǵy kezdesý ótti. Biz bul dástúrdi jalǵastyrýǵa niettimiz. Kelesi basqosýdy Aqtaýda ótkizýdi usynamyz, – dedi Qasym-Jomart Toqaev.
Túrkiia Prezidenti óziniń jáne delegatsiiasynyń atynan qazaq halqynyń qonaqjailyǵyna alǵys aityp, eki el arasyndaǵy barlyq saladaǵy yntymaqtastyqty odan ári damytýǵa múddeli ekenin jetkizdi.
– Biz Qazaqstan ekonomikasyn ártaraptandyrýǵa árdaiym atsalysyp kelemiz. Halyqty jumyspen qamtýǵa bailanysty bastamalaryńyzǵa bizdiń kompaniialar da óz úlesin qosatynyna senimdimin. Biz saýda ainalymyn qysqa merzimde 5 milliard, orta merzimde 10 milliard dollarǵa jetkizýge kelisken bolatynbyz. Ázirge bári josparǵa sáikes júrgizilip keledi. Kólik-logistika salasyndaǵy yntymaqtastyǵymyz bizdiń orta merzimge josparlaǵan mejemizge tez jetýge múmkindik beredi. Kaspiidiń mańyzy artyp keledi. Bakýdegi úshjaqty kezdesý sátti ótti. Aqtaýdaǵy basqosý bul jumystardy ilgeriletedi dep senemiz. Biz jahandyq azyq-túlik qaýipsizdigin arttyrý jónindegi álem aldyndaǵy mindetimizdi tiisti deńgeide oryndap kelemiz. Bul turǵyda astyǵy mol Qazaqstannyń áleýetin paidalanýǵa bolady dep esepteimin, – dedi Rejep Taiip Erdoǵan.
Pikir almasýlardan keiin kún tártibindegi 5 máselege jaýapty eki eldiń ministrleri sóz sóiledi.
Kelissózderden keiin Memleketter basshylarynyń qatysýymen resmi delegatsiialardyń músheleri mynadai qujattarǵa qol qoidy:
1. «Qazaqstan Respýblikasynyń Úkimeti men Túrkiia Respýblikasynyń Úkimeti arasyndaǵy densaýlyq saqtaý salasyndaǵy yntymaqtastyq týraly» kelisim.
2. «Qazaqstan Respýblikasynyń Úkimeti men Túrkiia Respýblikasynyń Úkimeti arasyndaǵy veterinariialyq qyzmetter kórsetý saiasaty jáne tamaq ónimderiniń qaýipsizdigi salasyndaǵy yntymaqtastyq týraly» kelisim.
3. «Qazaqstan Respýblikasynyń Mádeniet jáne sport ministrligi men Túrkiia Respýblikasynyń Mádeniet jáne týrizm ministrligi arasyndaǵy mýzei isi, eskertkishterdi qorǵaý jáne restavratsiialaý salasyndaǵy yntymaqtastyq týraly» memorandým.
4. «Qazaqstan Respýblikasynyń Mádeniet jáne sport ministrligi men Túrkiia Respýblikasynyń Mádeniet jáne týrizm ministrligi mádeniet salasyndaǵy yntymaqtastyq týraly» memorandým.
5. «Qazaqstan Respýblikasynyń Saýda jáne integratsiia ministrligi men Túrkiia Respýblikasynyń Saýda ministrligi arasyndaǵy tehnikalyq retteý, standarttaý, metrologiia, akkreditteý jáne sáikestikti baǵalaý salasyndaǵy yntymaqtastyq jónindegi ózara túsinistik týraly» memorandým.
6. «Qazaqstan Respýblikasynyń Eńbek jáne halyqty áleýmettik qorǵaý ministrligi men Túrkiia Respýblikasynyń Otbasy isteri, eńbek jáne áleýmettik qyzmetter ministriligi arasyndaǵy yntymaqtastyq jónindegi ózara túsinistik týraly» memorandým.
