27 aqpanda AQSh prezidenti Donald Tramptyń burynǵy advokaty Maikl Koen kongreste Trampqa qarsy kýálik etti. Onyń sózinshe, AQSh prezidenti ulynyń 2016 jyly Trump Tower-de Resei ókilderimen kezdeskeni jaily jáne AQSh prezidenti sailaýynda Tramptyń saiasi básekelesi retinde Demokratiialyq partiiadan sailaýǵa qatysqan Hillari Klintonnyń jeke hattary jariia bolatyny týraly aldyn ala bilgen.
Kongrestegi kýáliginde Koen Tramp sailaý aldy kampaniiasy kezinde de Máskeý qalasynda záýlim ǵimarat salý josparymen shuǵyldanǵanyn aitty.
Maikl Koen AQSh kongresi baqylaý palatasy ókilderiniń aldynda ant berip turyp "ózimniń álsizdik kórsetkenime, Trampty qorǵap, onyń joǵarylaýyna úles qosqanyma uialamyn. Ar-ojdanyma qulaq asý ornyna Tramptyń zańsyz áreketterin qoldaǵanyma uialamyn. Mister Tramptyń kim ekenin bilemin. Ol - násilshil, sýait jáne alaiaq" dedi
Koen Tramp pen onyń sailaý kampaniiasy ókilderiniń Máskeýmen ymyralasqany jaily naqty dáleli joǵyn aitty.
Vetnamda Kim Chen Ynmen kezdesýde júrgen AQSh prezidenti Koennyń kýáligin teriske shyǵardy.
"Ókinishke orai, Maikl Koen meniń ókilim sanalatyn zańgerlerimniń biri boldy. Onyń menen ózge de klientteri bar edi. Ol ótirik aitqany men alaiaqtyǵy úshin qazir ǵana Joǵarǵy sottyń sheshimimen advokattyq qyzmetinen aiyryldy. Trampqa esh qatysy joq oisyz áreketterge bardy. Ol túrmede azyraq otyrý úshin ótirik aityp otyr. Qiianatshyl zańger!", - dep jazdy AQSh prezidenti Twitter-de.
