AQSh prezidenti Donald Tramp 4 qańtarda keshke kongreste joldaý jasady. Qarasha aiynda ekinshi merzimge sailanýdan úmitti Tramp eń áýeli ekonomikadaǵy jetistikterge toqtaldy. 2016 jyly sailaýaldy kampaniiasy kezinde "Amerikany qaita uly memleketke ainaldyraiyq" dep urandaǵan Tramp seisenbi kúni kongreste minberge shyǵyp "uly Amerikany basqarýdy" qaita qolǵa alǵanyn kóptiń esine salǵysy keletinin aitty.
"Jumys oryndary kóbeiip jatyr, tabys molaidy, kedeilik deńgeii tómendedi, qylmys azaidy, halyq senimi artty, memleketimiz qaita órkendep jatyr jáne elimizdiń abyroiy artty" dedi Tramp.
Alǵashqy jarty saǵat boiy ekonomikadaǵy jetistikter týraly aitqan Tramp jalaqy, jumyspen qamtý jáne qor naryǵyndaǵy kórsetkishterge toqtaldy.
Seisenbi kúni kongreste joldaý bastalmai turyp respýblikashyldar "taǵy tórt jyl" dep aiqailady. Olar prezident úzilis jasaǵan saiyn oryndaryn turyp, qol shapalaqtap otyrdy. Al demokrattar esh emotsiia bildirmesten únsiz qarap otyrdy.
5 aqpanda senatta prezidentke impichment jariialaý isi boiynsha daýys berý bastalady. Jeltoqsan aiynda basym kópshiligi demokrattardan quralǵan ókilder palatasy Trampqa impichment jariialaýdy maquldaǵan. Basym bóligi respýblikashyldardan quralǵan senat 5 aqpanda prezidentti aqtaidy degen boljam aitylady.
