6 qańtar kúni AQSh prezidenti Donald Tramp jaqtastarynyń toby Kongreske basyp kirip, AQSh parlamentiniń qarashadaǵy prezident sailaýynyń nátijesin kýálandyrýǵa arnalǵan ortaq otyrysyn toqtatyp tastady. Olar politsiiamen qaqtyǵysyp ta qaldy.
Bastapqyda politseiler kózden jas aǵyzatyn gaz, túrli-tústi granat qoldanyp tártipsizdiktiń aldyn almaq bolǵan. Kongresske kiretin birneshe keńse evakýatsiialandy.
"Narazylyq bildirýshiler Kapitoliige shabýyl jasap, senat zalyn basyp aldy. Olar bizden ishte turýymyzdy surady", - dep jazdy amerikalyq senator Djeims Lenkford Twitter jelisindegi paraqshasynda.
Narazylyqtar AQSh Kongresi qarashada ótken prezident sailaýynyń nátijelerin resmi túrde bekitý rásimin ótkizip jatqan kezde bastaldy. Sailaý qorytyndylaryn bekitýge qarsylyqtar aitylyp, talqylaý júrgizildi.
Oklahoma shtatynyń senatory Djeims Lenkfordtyń sóilep jatqan kezde ony aiaqtaýǵa múmkindik bermei, tóraǵa ústeldi balǵamen uryp, senatorlar qaita shaqyrylǵanǵa deiin jumys toqtatylatynyn málimdedi. Osydan keiin habar taratý toqtatylǵan bolatyn.
Kongrestiń kýálandyrýy – AQSh-tyń jańa sailanǵan prezidenti Djo Baidenniń inaýgýratsiiasy aldyndaǵy eń sońǵy formaldy rásim. Bul rásim ádette tynysh ótetin. Biraq biyl AQSh prezidenti sailaýdyń ádil ótpegenin aityp, onyń nátijesin moiyndamaýǵa shaqyrdy. Kongrestegi 14 respýblikashyl senator men ókilder palatasynyń 100-den astam respýblikashyl múshesi kei shtattardyń nátijesin kýálandyrýǵa qarsy shyǵatynyn málimdedi.
Kýálandyrý Kongrestegi qos palatanyń ortaq otyrysynda júrýi tiis bolǵan. Otyrys bastalǵanda Tramp jaqtastary Kapitolii ǵimaratyna basyp kirip, otyrys ýaqytsha toqtap qaldy. Trampshyl narazylar politsiiamen qaqtyǵysyp qaldy.
Sailaý nátijesin moiyndamaý bastamasy Kongrestegi respýblikashyldardy ekige bóldi. Senattaǵy respýblikashyldardyń lideri Mitch Makkonnel kýálandyrý aldyndaǵy pikirsaiysty bastai otyryp, sailaý nátijesin teriske shyǵarǵaly otyrǵan partiialastaryna synady.
"Sailaýshylar, sottar, shtattar – bulardyń bári aitaryn aitty. Eger biz olardyń aitqanyn teriske shyǵarsaq, respýblikamyzǵa ómir boiyna nuqsan keltiremiz" dedi Makkonnel.
Missýri shtatynan sailanǵan senator Djosh Hoýli men Tehas shtatynan sailanǵan senator Ted Krýz bastaǵan ondaǵan respýblikashyl senator men ókilder palatasynyń júzdegen múshesi Arizona, Djordjiia, Nevada, Michigan, Pennsilvaniia jáne Viskonsin shtattaryndaǵy sailaý nátijesin moiyndamaý nietinen áli de bas tartpai otyr.
Respýblikashyldardyń talpynysy Baidenniń prezident atanýyn toqtatýy ekitalai. Óitkeni ókilder palatasy demokrattar baqylaýynda jáne respýblikashyldar arasynda partiialastarynyń bastamasyna qarsylar da bar.
3 qarashada ótken prezident sailaýynda resmi nátije boiynsha 306-232 (elektorlar daýysy) esebimen Djo Baiden jeńiske jetken. Biraq Tramp sailaý nátijesin moiyndaýdan bas tartyp, «sońyna deiin berilmeitinin» aitty.
Kongrestegi otyrys bastalar aldynda Tramp jaqtastary Vashington ortalyǵynda úlken miting ótkizip, onda Tramptyń ózi sóz sóiledi.
"Biz eshqashan berilmeimiz. Biz eshqashan moiyndamaimyz" dedi Tramp jinalǵan qaýymǵa.
Trampshyl narazylar keiinirek Kapitolii aldyndaǵy qorshaýdy buzyp, ǵimaratqa basyp kirdi.
