Foto: Theins.ru
Aq úide Donald Tramp, Vladimir Zelenskii jáne Ýkrainany qoldaý úshin kelgen birneshe eýropalyq liderdiń qatysýymen ótken kelissózder aiaqtaldy, dep habarlaidy Ult.kz.
Aqpandaǵy sátsizdikten aiyrmashylyǵy, bul joly eshkim ashyq sóztalasqa barǵan joq. Kerisinshe, kúlimsirep otyrǵan Tramp Ýkrainaǵa qaýipsizdik kepildikterin ýáde etti. Alaida bul kepildik negizinen Eýropa tarabynan, tek «AQSh-pen úilestirý arqyly» bolady.
Sondai-aq ol Pýtin men Zelenskiidiń jeke kezdesýine daiyndyqty bastaǵanyn málimdedi. Degenmen Kreml naqty ýáde bermei, manevr jasaýǵa múmkindik qaldyrdy. Al Zelenskii aýmaqtyq máselelerdi tek Pýtinmen ǵana talqylaýǵa daiyn ekenin anyq bildirdi.
Nátijesinde Tramp pen Zelenskiidiń jýrnalisterge ashyq bóliginiń basym bóligi ózara madaq aitysýǵa arnaldy. Sosyn olar jabyq kelissózge kirip ketti.
Bul joly Zelenskii 3 birdei kozyrmen keldi: Birinshisi Eýropa liderleriniń anyq qoldaýy bar. Ekinshisi «Flamingo» dep atalatyn ýkrainalyq qanatty zymyran óndirisi bastalǵany týraly jańalyq. Aita ketsek, bul zymyran Máskeýge de, Sankt-Peterbýrgke de jete alady. Taǵy bir basymdyǵy – Zelenskiidiń maidandaǵy qorǵanys shebi myqty ekeni týraly dálelderi bar.
Endi kezdesýdiń qorytyndysyn aitsaq, Ýkraina NATO-ǵa eshqashan kire almaidy. Muny Tramp málimdedi.
Financial Times gazetiniń málimetinshe, Ýkraina delegatsiiasynyń qujatynda AQSh-tan qaýipsizdik kepildikterin alý úshin Kiev 100 milliard dollar kóleminde amerikalyq qarý-jaraq satyp alýǵa daiyn ekeni jazylǵan.
Kezekti málimet: Tramp Reseige qoiylǵan oq atýdy toqtatý talabynan bas tartqan. Onyń aitýynsha, beibitshilikke qol jetkizý úshin bitim mindetti túrde alǵyshart bolmaýy múmkin.
Al budan keiingi taǵy bir jańalyǵy – Tramp kelissózdi orta jolda toqtatyp, Pýtinmen telefon arqyly 40 minýttai sóilesken.
Kezdesý qorytyndysyn Tramp ta, Zelenskii de baspasóz máslihatynda emes, áleýmettik jelilerde jariialady.
Tramp kezdesýdi "óte joǵary deńgei" dep atady. Onyń sózinshe, ekijaqty kezdesýden keiin óziniń qatysýymen úshjaqty sammit ótkizý josparlanyp otyr. Al Zelenskii "uzaq ári egjei-tegjeili áńgime" bolǵanyn, onda maidandaǵy jaǵdai jáne beibitshilikke qol jetkizý úshin qajetti qadamdar talqylanǵanyn aitty.
