15 sáýirde AQSh-ta Pýlittser syilyǵyn tabystaý saltanaty ótti. Júlde alǵandar qatarynda AQSh prezidenti Donald Tramp pen onyń otbasy jaily eki bólek zertteý júrgizgen The New York Times (NYT) jáne Wall Street Journal (WSJ) basylymdary bar.
New York Times basylymynyń jýrnalisteri - Devid Barstoý, Siýzanna Kreig pen Rass Biýttner syilyqty Tramp qarjysy jaily, onyń "biznes-imperiiasyna qoldaý bolǵan salyqtan jaltarý amaldary" jaily zertteýi úshin aldy.
WSJ jýrnalisteri syilyqty 2016 jyly "buryn prezidentpen jaqyn qarym-qatynasta bolǵan" eki áielge olar áldeneni jariia etpes úshin Tramptyń qarjy bergeni týraly zertteýi úshin iemdendi.
Pýlittser syilyǵynyń eń bedeldi "Qoǵamǵa qyzmet" nominatsiiasyn Floridadanyń Parklend qalasyndaǵy mektepte bolǵan atys kezinde mektep ákimshiligi men politsiia qatesin áshkerelegen South Florida Sun Sentinel basylymynyń jýrnalisteri aldy.
"Halyqaralyq reportaj" nominatsiiasyn Iemendegi soǵys saldary týraly jazǵan Associated Press jýrnalisteri men Mianmadaǵy musylman rohindjalar týraly jazyp, keiin bilik túrmege kesken Reuters agenttiginiń qos tilshisi aldy.
Reuters fototilshileri AQSh shekarasyndaǵy migranttar beinelengen sýretteri úshin júlde iemdendi.
Ádebiet salasyndaǵy syilyq Richard Paýers pen Djeki Sibblis Dreri berildi.
Pýlittser syilyǵy - ádebiet, jýrnalistika jáne teatr salalaryndaǵy amerikalyq eń mártebeli syilyqtardyń biri. Syilyq tegi vengr-evrei gazet magnaty, 1911 jyly qaitys bolǵan Djozef Pýlittser qaldyrǵan qor negizinde taǵaiyndalady. 1903 jyly ol qarjysyn qalai paidalaný týraly ósiet qaldyrǵan. Mangattyń ósiet qaldyrǵan kúni Pýlittser syilyǵy taǵaiyndalǵan kún dep sanalady. Júlde syiaqysy - 15 myń dollar.
