Helsinkide Resei prezidenti Vladimir Pýtinmen kezdesýge birneshe saǵat qalǵanda AQSh prezidenti Donald Tramp Twitter paraqshasynda: "AQSh pen Reseidiń qarym-qatynasy eshqashan tap qazirgidei nashar bolǵan emes jáne buǵan AQSh-tyń uzaq jyldan bergi aqymaqtyǵy kináli" degen jazba jariialady.
Tramp ózi "jalmaýyzdyń izin kesý" dep ataityn, Reseidiń 2016 jyly AQSh prezidenti sailaýyna yqtimal aralasýyn tergeý isin eske salyp, sol kezdegi prezident Barak Obamanyń "aralasýǵa" eshbir reaktsiia tanytpaǵanyn, al ózin qarsylastary Reseimen "kelisimge keldi" dep aiyptaýǵa kóshkenin aitty.
13 shilde AQSh Reseidiń Bas barlaý basqarmasynyń 12 qyzmetkerine aiyp taqqan soń birneshe amerikalyq senator Trampqa Pýtinmen kezdesýden bas tartýdy, ia kezdesý taqyrybyn "Reseidiń sailaýǵa aralasýyna arnaýdy" usynǵan.
Helsinkide Tramptyń janynda júrgen AQSh-tyń memlekettik hatshysy Maik Pompeo týitterinde "Reseimen qarym-qatynasty jaqsartý bárine paidaly bolady, biraq qazir dop Resei tarabynda" dep jazǵan.
16 shilde tańerteń Tramp Finliandiia prezidenti Saýli Niinistemen kezdesti. Aq úidiń aqparatynsha, Tramp pen Pýtin jergilikti ýaqyt boiynsha 13.20-da (Qazaqstan ýaqytymen 16.20 – red.) kezdesedi. Eki el prezidenti bir jarym saǵat boiy ońasha sóilesedi, keiin olarǵa delegatsiia ókilderi qosylady. Qazaqstan ýaqytymen 19.50-de birikken konferentsiia bastalady.
Eki iri iadrolyq derjava prezidentteriniń kezdesýde ne talqylaityny aldyn ala aitylmaýy – alǵash ret bolyp turǵan jaǵdai. Birneshe kún buryn basylymdar Tramp pen Pýtin Ýkraina batysyndaǵy jaǵdai men Resei annektsiialap alǵan Qyrym jaily sóilesetinin jazǵan. Iadrolyq qarýsyzdandyrý men iadrolyq qarýdy taratpaý týraly da áńgime bolatyny aityldy.
Tramp Reseidiń AQSh-taǵy sailaýǵa yqtimal aralasýy jaily sóilesetinin rastady.
