Aq úidiń habarlaýynsha, AQSh prezidenti Donald Tramp 2 tamyz kúni Reseige, Iranǵa jáne Soltústik Koreiaǵa jańa sanktsiialar salatyn zańǵa qol qoidy, dep habarlaidy "Ult aqparat" Azattyqqa silteme jasap.
AQSh Kongresi shildeniń sońynda Reseige AQSh-ta 2016 jyly ótken prezident sailaýy naýqanyna aralasqany úshin jáne Qyrymdy basyp alyp, Ýkrainanyń shyǵysyndaǵy separatisterge dem bergeni úshin qatań sanktsiia salý týraly zań jobasyn maquldaǵan edi.
Jańa zań Reseidiń energetika kompaniialaryn nysanaǵa alyp, olardyń operatsiialaryna shekteý qoiady. Zańǵa sáikes prezident Tramp Kongrestiń maquldaýynsyz Máskeýge qarsy engizilgen sanktsiialardy jumsarta almaidy.
Bul zańnyń bekitilýi byltyrǵy sailaý naýqany kezinde Máskeý men Vashingtonnyń qarym-qatynasyn jaqsartýǵa shaqyrǵan Tramptyń úmiti jýyr ýaqytta aqtalmaitynyn kórsetti.
Resei prezidenti Vladimir Pýtin zań jobasyn Kongress maquldaǵan kezde ashýly reaktsiia tanytqan ári zań bekitilmei jatyp 30 shilde kúni Reseidegi AQSh-tyń diplomatiialyq qyzmetkerlerin 755 adamǵa qysqartý týraly buiryq bergen. Máskeýdiń bul sheshimi Reseidiń Ýkrainadaǵy agressiiasy, Siriia soǵysyndaǵy róli men 2016 jylǵy AQSh sailaýyna aralasýy týdyrǵan Vashingtonmen aradaǵy shielenisti odan saiyn kúsheitip jiberdi. Resei AQSh-tyń sanktsiia salýyn "ózin jónsiz oqshaýlaý" dep aiyptaidy.
AQSh Kongresi Reseige salynyp otyrǵan jańa qatań sanktsiialardy Eýropa Odaǵynyń ótinishi boiynsha sál ózgertken. EO jetekshileri bul sanktsiialar Nord Stream munai qubyry jobasyn salý boiynsha Reseimen yntymaqtasqan Batys kompaniialaryna kesirin tigizbeý kerektigin eskertken edi.
Jańa sanktsiialarǵa qarsy Iran 1 tamyz kúni BUU-na shaǵymdanyp, AQSh-ty "alty iadrolyq derjava arasynda jasalǵan kelisimdi buzdy" dep aiyptaǵan. Iran parlamentiniń spikeri Áli Laridjani sońǵy sanktsiialar 2015 jylǵy iadrolyq kelisim-shartty buzady dep málimdegen.
