AQSh prezidenti SShA Donald Tramp Resei men Qytaidyń Soltústik Koreiaǵa qarsy jańa sanktsiia salý týraly BUU Qaýipsizdik keńesi qararyn qoldap daýys bergenin quptady. Bul týraly Aq úi baspasóz qyzmeti taratqan aqparatta aitylǵan.
Onda Tramptyń "Soltústik Koreiany qaýipti turaqsyzdyq týǵyzatyn is-qimylyn toqtatýǵa májbúr etý úshin oǵan diplomatiialyq jáne ekonomikalyq qysymdy kúsheitý jóninde odaqtastar jáne áriptestermen birge jumysty jalǵastyrýǵa nietti" ekeni aitylǵan.
Osynyń qarsańynda BUU qaýipsizdik keńesi Soltústik Koreiaǵa zymyran ushyrý synaqtaryn ótkizýdi jalǵastyrǵany úshin jańadan sanktsiialar salý týraly qarardy biraýyzdan qabyldaǵan. Ol sanktsiialar saldarynan Phenian eksporttan túsetin tabystyń úshten bir bóligi – bir milliard dollardan aiyrylýy múmkin.
Jańa sanktsiia boiynsha Soltústik Koreianyń syrtqa shyǵaratyn kómir, temir, qorǵasyn jáne teńiz ónimderine embargo salynady. Buǵan qosa BUU-ǵa múshe elderde Soltústik Koreiadan barǵan jumysshylar sanyn kóbeitýge, Soltústik Koreiamen birlesken kásiporyndardy keńeitýge jáne ondai kásiporyndardy jańadan qurýǵa tyiym salynady. BUU sanktsiia tizimine burynǵylarǵa qosymsha Soltústik Koreianyń toǵyz azamaty men tórt kompaniiasy engizilgen.
Senbi kúni BUU-daǵy Qytai ókili Liý Tszei Pheniandy Korei túbegindegi shielenisti odan saiyn ýshyqtyratyn qadamdarǵa barmaýǵa shaqyrdy. Reseidiń ókili Vasilii Nebenzia Soltústik Koreiany iadrolyq baǵdarlamadan bas tartýǵa úndedi.
Buǵan deiin AQSh Pheniannyń jaqynda eki qaitara ótkizgen qurlyqaralyq ballistikalyq zymyran synaǵyna jaýap retinde osy elge qarsy jańa sanktsiialar engizý týraly usynys engizgen.
Soltústik Koreiaǵa iadrolyq jáne zymyran baǵdarlamasymen ainalysýyna tyiym salǵan BUU-nyń buǵan deiin qabyldaǵan qararlaryn Phenian oryndamai, synaqtardy jalǵastyrǵan. Ony álem ederiniń kópshiligi aiyptaǵan.
