Foto: RIA Novosti
AQSh Reseidiń Ýkrainaǵa jasaǵan jańa shabýyldarynan keiin — saldarynan jeti adam, onyń ishinde eki bala qaza tapqannan soń — Reseidiń iri munai kompaniialary «Rosneft» pen «Lýkoilǵa» qarsy qatań sanktsiialar engizdi, dep habarlaidy Ult.kz.
Ministrlik málimetinshe, sheshim Máskeýdiń «beibit kelissózderge shynaiy daiyn emestigimen» bailanysty qabyldanǵan. Sanktsiialar atalǵan kompaniialardy amerikalyq qarjy júiesinen oqshaýlap, dollarmen kez kelgen operatsiia júrgizýge tyiym salady. Bul shekteýlerdi buzǵandarǵa, sonyń ishinde sheteldik bankterge de, qatań jazalaý sharalary qarastyrylǵan.
Prezident Donald Tramp bul sheshimdi «asa mańyzdy qadam» dep atap, «eger soǵys toqtasa, sanktsiialar uzaqqa sozylmaidy» degen úmit bildirdi.
Bul sheshim kelesi aptada Vengriiada ótýi tiis bolǵan Tramp pen Pýtinniń kezdesýi bolmaityn bolǵannan keiin qabyldandy. Aq úi derekkózi habarlaǵandai, Vashington kelissózdi «ýaqyty kelmegen» dep eseptegen, sebebi Máskeý men Kiev arasyndaǵy progress baiqalmaǵan. Sammittiń toqtatylýy AQSh pen Resei arasyndaǵy qatynastardyń jańa kezeńin bildiredi.
Buǵan deiin Tramp atysty toqtatý bastamasyn qoldaitynyn málimdegen, alaida Máskeý bul usynysqa kelispegen. The Washington Post-tyń habarlaýynsha, «Rosneft» pen «Lýkoilǵa» salynǵan bul sanktsiialar — Tramptyń ekinshi prezidenttik merzimindegi Reseige qarsy alǵashqy iri shara.
Pýblitsist Vitalii Portnikovtyń pikirinshe, Tramp soǵysty toqtatý úshin Zelenskii men Pýtinge qysym kórsetýde. Ol AQSh basshysy Kremlge «erekshe sharttarmen» bitim usynýǵa tyrysyp otyr dep sanaidy. Eger Pýtin kelisimge kelmese, Vashington Ýkrainaǵa Tomahawk sekildi alys qashyqtyqtaǵy zymyrandar berýdi qarastyrýy múmkin. Portnikovtyń aitýynsha, bul qadam jańa iri qaqtyǵystyń bastalýyna sebep bolýy ǵajap emes.
