AQSh prezidenti Donald Tramp pen Resei prezidenti Vladimir Pýtin senbi kúni telefon arqyly áńgime ótkizdi. Bul Tramptyń qyzmetine resmi kiriskeli beri alǵash ret Pýtinmen sóilesýi.
Aq úi taratqan málimdemede eki basshynyń 40 minýtqa jýyq ýaqytqa sozylǵan "pozitivti" áńgime "Qurama Shtattar men Resei arasyndaǵy jaqsartýdy qajet etetin qarym-qatynastardyń mańyzdy bastaýy" ekeni aitylǵan.
«Prezident Tramp ta, prezident Pýtin de búgingi áńgimeden keiin eki tarap terrorizmmen kúres jáne ózara múddelilik tanytyp otyrǵan kún tártibindegi basqa da máseleler boiynsha jyldam ilgerileitin bolady dep úmittenedi» delingen Aq úi málimdemesinde.
Resei prezidentiniń baspasóz qyzmeti telefon áńgimesi barysynda eki eldiń basshylary "Islam memleketi" terrorlyq toby men Siriiadaǵy oǵan uqsas ózge de uiymdardy joiý maqsatynda AQSh pen Reseidiń is-áreketterin shynaiy túrde úilestirýdi jolǵa qoiýdy" quptaityndaryn bildirdi dep habarlady. Sonymen birge, Pýtin men Tramp áńgime barysynda halyqaralyq taqyryptaǵy ózge de máselelerdi, sonyń ishinde "Taiaý Shyǵystaǵy ahýal, Irannyń iadrolyq baǵdarlamasy men Koreia túbegine qatysty jaǵdai, Ýkraina daǵdarysynyń negizgi aspektilerin" talqylady deidi Resei taraby. Kremldiń habarlaýynsha, Vladimir Pýtin men Donald Tramp ekeýara kezdesýge daiyndyqty bastaý týraly kelisken.
Resei prezidentiniń baspasóz hatshysy Dmitrii Peskovtyń sózinshe, Pýtin men Tramptyń áńgimesinde Reseige salynǵan sanktsiia máselesi qozǵalmaǵan.
AQSh prezidentiniń baspasóz hatshysy Shon Spaiserdiń aitýynsha, Tramp Pýtinmen sóilespes buryn Germaniia kantsleri Angela Merkelmen telefon arqyly áńgimelesken.
