AQSh prezidenti Donald Tramp pen Resei prezidenti Vladimir Pýtin. Gambýrg, 7 shilde 2017 jyl.
AQSh prezidenti Donald Tramp pen Resei prezidenti Vladimir Pýtin ekeýara alǵashqy kezdesýde Siriia men Ýkrainadaǵy jaǵdaidy, terrorizm men kiberqylmysqa qarsy kúres, Soltústik Koreia tóńiregindegi ahýaldy talqylaǵan.
Kezdesýge qatysqan AQSh memlekettik hatshysy Reks Tillerson men Resei syrtqy ister ministri Sergei Lavrovtyń aitýlarynsha, taraptar ózara is-qimyl, eń áýeli kiberqaýipsizdik salasy boiynsha ekijaqty jumysshy tobyn qurý týraly ýaǵdalasqan.
Lavrovtyń habarlaýynsha, kezdesýge qatysýshylar Shyǵys Ýkrainadaǵy jaǵdaidy aimaqtaǵy janjaldy beibit retteý týraly Minsk kelisimin oryndaý qajettigi turǵysynan talqylaǵan.
AQSh memlekettik hatshysy Reks Tillerson kezdesý basynda Tramptyń AQSh-ta ótken jylǵy sailaýǵa reseilikterdiń aralasýyna bailanysty amerikalyqtardyń alańdaýshylyǵyn jetkizgeni týraly habarlady. Tillersonnyń aitýynsha, Pýtin Máskeýdiń álgindei is-áreketterge qatysy joǵyn aitqan.
Budan ózge Tillerson AQSh pen Reseidiń Soltústik Koreianyń qarý baǵdarlamasyna qatysty ahýaldy retteýge kózqarasy árqily ekenin aitty. Onyń sózinshe, Vashington Soltústik Koreiamen ekonomikalyq bailanysy bar Máskeýdi Pheniandy tejeýge belsendi qimyldaýǵa kóndirý úshin oǵan qysym jasaýyn jalǵastyra bermek.
AQSh memlekettik hatshysy Tramp pen Pýtinniń kezdesýinde amerikalyq zymyrannan qorǵanys júiesi týraly másele qozǵalmaǵany týraly aitty.
Gambýrgtegi «Úlken jiyrmalyq» (G20) cammiti kezinde ótken Tramp pen Pýtinniń alǵashqy kezdesýi eki saǵattan astam ýaqytqa jalǵasqan.
