AQSh prezidenti Donald Tramp pen prezidenttikten úmitker demokrat Djo Baiden beisenbi kúni sailaýshylarmen kezdesti. Olardyń kezdesýi eki arnadan tikelei efirde bir mezgilde kórsetildi, dep habarlaidy Azattyq.
Filadelfiiada Baidenniń sailaýshylarmen kezdeskenin - ABC arnasy, Maiamide prezident Donald Tramptyń sailaýshylarymen kezdesýin NBC arnasy kórsetti.
Buǵan deiin koronavirýspen aýyryp shyqqan Tramp Baidenmen onlain debat ótkizýden bas tartqan, odan keiin úmitkerlerge debatqa balama retinde sailaýshylarmen kezdesý ótkizý usynylǵan edi.
Maiamide Tramp ashyq minberden sóz sóilegen. Oǵan koronavirýsqa shaldyǵý, salyq tóleý, densaýlyq saqtaý salasyndaǵy sharalar, meditsinalyq saqtandyrý, joǵarǵy sot sýdiasyn taǵaiyndaý siiaqty suraqtar qoiylǵan.
Tramp 3 qarashada ótetin sailaýda jeńilse, biliktiń beibit aýysýyn qamtamasyz etetinin aitqan, alaida jeńisten úmitti ekenin de jetkizgen.
Al Filadelfiiadaǵy ulttyq konstitýtsiialyq ortalyqta sailaýshylarmen kezdesken Baiden prezident Donald Tramptyń koronavirýspen kúres strategiiasyn, syrtqy saiasattaǵy olqylyqtardy synaǵan.
"Qazir Iran iadrolyq qarý jasaýǵa bet burdy, Soltústik Koreianyń zymyrany men bombasy kóbeidi, NATO boiynsha odaqtastar AQSh-qa senbeitinin aitady, Qiyr Shyǵys pen Tynyq muhitynyń batysynda da biz oqshaý turmyz" dedi Djo Baiden.
AQSh-ta prezidenttikten úmitkerlerdiń sońǵy debaty 22 qazanda ótýi tiis. Ol Tennesi shtatynda Neshvil qalasynda ótedi.
Reuters / Ipsos ótkizgen saýalnama qorytyndysy boiynsha, Baiden barlyq shtattar boiynsha Tramptan alda keledi, biraq Baidenniń de keibir shtattarda kórsetkishi aýytqyp tur.
