اقش پرەزيدەنتٸ دونالد ترامپ پەن پرەزيدەنتتٸكتەن ٷمٸتكەر دەموكرات دجو بايدەن بەيسەنبٸ كٷنٸ سايلاۋشىلارمەن كەزدەستٸ. ولاردىڭ كەزدەسۋٸ ەكٸ ارنادان تٸكەلەي ەفيردە بٸر مەزگٸلدە كٶرسەتٸلدٸ, دەپ حابارلايدى ازاتتىق.
فيلادەلفييادا بايدەننٸڭ سايلاۋشىلارمەن كەزدەسكەنٸن - ABC ارناسى, ماياميدە پرەزيدەنت دونالد ترامپتىڭ سايلاۋشىلارىمەن كەزدەسۋٸن NBC ارناسى كٶرسەتتٸ.
بۇعان دەيٸن كوروناۆيرۋسپەن اۋىرىپ شىققان ترامپ بايدەنمەن ونلاين دەبات ٶتكٸزۋدەن باس تارتقان, ودان كەيٸن ٷمٸتكەرلەرگە دەباتقا بالاما رەتٸندە سايلاۋشىلارمەن كەزدەسۋ ٶتكٸزۋ ۇسىنىلعان ەدٸ.
ماياميدە ترامپ اشىق مٸنبەردەن سٶز سٶيلەگەن. وعان كوروناۆيرۋسقا شالدىعۋ, سالىق تٶلەۋ, دەنساۋلىق ساقتاۋ سالاسىنداعى شارالار, مەديتسينالىق ساقتاندىرۋ, جوعارعى سوت سۋدياسىن تاعايىنداۋ سيياقتى سۇراقتار قويىلعان.
ترامپ 3 قاراشادا ٶتەتٸن سايلاۋدا جەڭٸلسە, بيلٸكتٸڭ بەيبٸت اۋىسۋىن قامتاماسىز ەتەتٸنٸن ايتقان, الايدا جەڭٸستەن ٷمٸتتٸ ەكەنٸن دە جەتكٸزگەن.
ال فيلادەلفيياداعى ۇلتتىق كونستيتۋتسييالىق ورتالىقتا سايلاۋشىلارمەن كەزدەسكەن بايدەن پرەزيدەنت دونالد ترامپتىڭ كوروناۆيرۋسپەن كٷرەس ستراتەگيياسىن, سىرتقى ساياساتتاعى ولقىلىقتاردى سىناعان.
"قازٸر يران يادرولىق قارۋ جاساۋعا بەت بۇردى, سولتٷستٸك كورەيانىڭ زىمىرانى مەن بومباسى كٶبەيدٸ, ناتو بويىنشا وداقتاستار اقش-قا سەنبەيتٸنٸن ايتادى, قيىر شىعىس پەن تىنىق مۇحيتىنىڭ باتىسىندا دا بٸز وقشاۋ تۇرمىز" دەدٸ دجو بايدەن.
اقش-تا پرەزيدەنتتٸكتەن ٷمٸتكەرلەردٸڭ سوڭعى دەباتى 22 قازاندا ٶتۋٸ تيٸس. ول تەننەسي شتاتىندا نەشۆيل قالاسىندا ٶتەدٸ.
Reuters / Ipsos ٶتكٸزگەن ساۋالناما قورىتىندىسى بويىنشا, بايدەن بارلىق شتاتتار بويىنشا ترامپتان الدا كەلەدٸ, بٸراق بايدەننٸڭ دە كەيبٸر شتاتتاردا كٶرسەتكٸشٸ اۋىتقىپ تۇر.
