AQSh prezidenti Donald Tramp jyl saiynǵy dástúr boiynsha irandyqtardy Naýryz meiramymen quttyqtap, Iran biligi men yqpaldy Islam revoliýtsiiasy saqshylarynyń korpýsyn synai málimdeme jasady, dep jazady Azattyq.
"Álemde kóktem kelýin toilaityn milliondaǵan adamdy tamasha jáne berekeli Naýryz merekesimen quttyqtaimyn" dedi Tramp 19 naýryz kúni túnge qarai taratqan quttyqtaýynda. Degenmen ol "Iran halqy elge qyzmet qylýdyń ornyna ózine qyzmet etetin basshylardyń tepkisine túskenine senimdi ekenin" aitty.
Tramp ásirese Islam revoliýtsiiasy saqshylary korpýsyn "shetelderde terrorizmdi qarjylandyrý úshin Iran halqyn tonap otyrǵan qaskúnem armiia" dep atady.
AQSh prezidenti saqshylar korpýsy "Siriia úkimetin jáne Siriia, Irak pen Iemendegi shiittik toptardy qoldaýǵa 16 milliard dollar qarjy jumsaǵanyn" málimdedi. Ol sonymen qatar saqshylar korpýsyn "Iran halqyn kedeishilikke túsirdi, azamattyq quqyqtaryn shektedi jáne qorshaǵan ortaǵa zardap keltirdi" dep aiyptady.
Tramp byltyrǵy Naýryz meiramyna orai quttyqtaýynda Iran saiasaty jaiynda eshnárse aitpaǵan edi.
AQSh Memlekettik departamenti de Naýryz merekesine bailanysty quttyqtaý joldap, biyl jyl basynan beri úkimetke qarsy úsh ret narazylyq tanytqan irandyqtardy maqtady.
"Byltyr, erkindik, ar-ujdan jáne adam quqyqtarynyń qorǵalýyn talap etip, barynsha ún shyǵara bastaǵan Iran halqy meni jigerlendirdi. AQSh ózderiniń oi-pikirin bildirý, din ustaný jáne beibit jiyn ótkizý erkindigin qalpyna keltirýge umtylatyndardy qoldaidy. Naýryz – bolashaqtan neni úmit etetinimizdi oilanatyn ýaqyt. Keler jyl barlyǵyna beibitshilik, erkindik jáne kórkeiý jyly bolsyn" dedi memlekettik hatshynyń orynbasary Djon Sallivan.
Djon Sallivan Naýryz meiramymen irandyqtardy ǵana emes, Aýǵanstan, Ázerbaijan, Qazaqstan, Qyrǵyzstan, Tájikstan, Túrkiia, Ózbekstan, Túrkimenstan jáne basqa da elderdegi bul merekeni atap ótetin azamattardy quttyqtaitynyn aitty.
Ortalyq Aziia men Kavkaz jáne Taiaý Shyǵystaǵy milliondaǵan adam 21 naýryzda jyl basy - kóktemgi kún men túnniń teńelýi retinde tanylǵan Naýryz merekesin toilai bastaidy. BUU Bas assambleiasy 2010 jyly Albaniia, Aýǵanstan, Ázerbaijan Iran, Qazaqstan, Qyrǵyzstan, Makedoniia, Tájikstan, Túrkimenstan, Túrkiia jáne Úndistannyń usynysymen 21 naýryzdy Halyqaralyq naýryz kúni dep belgilegen.
