AQSh prezidenti Donald Tramp (sol jaqta) pen Resei syrtqy ister ministri Sergei Lavrov Aq úide. Vashington, 10 mamyr 2017 jyl.
AQSh prezidenti Donald Tramp Resei syrtqy ister ministri Sergei Lavrovpen kezdesýin "óte jaqsy" dep baǵalady. Ol Vashington men Máskeý Siriiada alty jyl boiy jalǵasyp jatqan soǵysty toqtatýǵa birge kúsh jumsaitynyn aitty.
AQSh prezidenti Donald Tramp mamyrdyń 10-y kúni Aq úide Resei syrtqy ister ministri Sergei Lavrovty qabyldady. Bul Tramptyń qyzmetine resmi kiriskeli beri reseilik joǵary dárejeli diplomatpen alǵash ret kezdesýi. Oǵan burynǵy AQSh prezidenti Richard Niksonnyń tusynda ulttyq qaýipsizdik boiynsha keńesshi, memlekettik hatshy bolǵan áigili diplomat Genri Kissindjer, AQSh-taǵy Resei elshisi Sergei Kisliak qatysqan.
Lavrovpen ótkizgen kelissózden keiin Tramp kezdesý "óte jaqsy" ótkenin aityp, "Siriiadaǵy sumdyq qyryp-joiýǵa toqtaý salynýy tiis, barlyǵy osy baǵytta jumys istep jatyr" dep málimdegen.
Aq úi baspasóz quraldaryna arnaiy taratqan habarlamada AQSh prezidentiniń Siriiadaǵy janjaldy toqtatý úshin birlesip jumys isteý qajettigin atap ótkeni aitylǵan. Tramp Bashar Asad rejimin, Iran men Máskeýdiń odaqtastaryn tejeý qajettigin aitqan. Sonymen birge ol óz ákimshiligi Shyǵys Ýkrainadaǵy osy ýaqytqa deiin 9,9 myńnan astam adamnyń ómirin qiǵan qarýly janjaldy sheshýge qatysýǵa beiil ekenin, Minsk kelisimderin tolyq kólemde júzege asyrýǵa Reseige jaýapkershilik júkteletinin málimdegen. Budan ózge Tramp Taiaý Shyǵys pen basqa da jerlerdegi janjaldardy sheshýge qatysty áriptestikti keńeitý múmkindigi týraly máseleni de qozǵaǵan. AQSh prezidenti óz eli men Resei arasynda qarym-qatynastardy odan ary jaqsartýǵa nietti ekenin aitqan.
Tramppen kezdesýden keiin Vashingtonda baspasóz máslihatyn ótkizgen Sergei Lavrov Resei men AQSh Siriiada qaýipsiz aýmaqtar qurý boiynsha yntymaqtastyqqa ázir dep málimdegen. Onyń aitýynsha, ózara is-qimyldyń naqty tetikteri AQSh tarapymen kelissózder aiasynda talqylanǵan.
Resei syrtqy ister ministri terrorizmdi joiý qajettigin atap ótken. Siriia daǵdarysyn retteýge qatysty sózinde Lavrov "Aq úidegi kezdesý kezinde prezident Tramptyń AQSh úshin Siriia máselesinde terrorizmdi jeńý basymdyq ekenin" aitqanyn jýrnalisterge jetkizgen. "Biz buǵan tolyq qosylamyz" degen Lavrov.
Aýǵanstandaǵy jaǵdaiǵa qatysty pikirinde Lavrov "Taliban" qozǵalysyna Resei járdem bergen degen habarlardy joqqy shyǵarǵan. Sonymen birge ol Aýǵanstandaǵy jaǵdaidy qalypqa keltirýdi kózdeitin sol eldegi barlyq kúshterdiń yntymaqtastyǵy qajet bolatynyn aitqan.
Lavrovtyń sózinshe, Tramppen kezdesýde Reseige salynǵan sanktsiialar máselesi de, "Reseidiń AQSh-taǵy sailaýǵa aralasýy" taqyryby da qozǵalmaǵan.
"Qazir bizdiń dialog Obama ákimshiligine tán bolǵan ideologiialandyrýdan ada. Tramp ákimshiligi – prezidenttiń ózi de, memlekettik hatshy da - istiń adamdary ekenine kózim jetti" dep málimdegen Resei syrtqy ister ministri.
Lavrov AQSh prezidenti Donald Tramp pen Resei prezidenti Vladimir Pýtin shilde aiynda Germaniiada ótetin úlken jiyrmalyq sammitine kezdesýge ýaǵdalasqanyn habarlaǵan.
Resei syrtqy ister ministrimen Vashingtonda kezdesýden bir kún buryn AQSh prezidenti eldiń federaldyq tergeý biýrosynyń (FBI) basshysy Djeims Komidi qyzmetinen alyp tastaǵan. Ótken jylǵy AQSh prezidenti sailaýy kezinde Tramptyń sailaý shtaby músheleriniń Reseimen bailanysynyń bar-joǵyna tekserý júrgizip jatqan mekeme basshysyn otstavkaǵa jibergen prezident Tramptyń sheshimin Kongrestegi demokrattar synǵa alǵan.
Aq úidegi kezdesýge deiin Resei syrtqy ister ministri Sergei Lavrov Vashingtonda AQSh memlekettik hatshysy Reks Tillersonmen de júzdesken. Tillerson men Lavrovtyń mamyrdyń 10-y kúngi kezdesýinen keiin AQSh memlekettik departamenti taratqan málimdemede Tillerson reseilik áriptesine Ýkrainadaǵy janjaldy retteýge qatysty Minsk kelisimin tolyq júzege asyrý qajettigin aityp, «Máskeý Reseige sanktsiialar salýǵa sebep bolǵan is-áreketterin doǵarmaiynsha olardyń kúshinde qalatynyn» jetkizgeni aitylǵan.
