ترامپ لاۆروۆپەن "ٶتە جاقسى" كەلٸسسٶز ٶتكٸزگەنٸن ايتتى

اقش پرەزيدەنتٸ دونالد ترامپ مامىردىڭ 10-ى كٷنٸ اق ٷيدە رەسەي سىرتقى ٸستەر مينيسترٸ سەرگەي لاۆروۆتى قابىلدادى. بۇل ترامپتىڭ قىزمەتٸنە رەسمي كٸرٸسكەلٸ بەرٸ رەسەيلٸك جوعارى دەرەجەلٸ ديپلوماتپەن العاش رەت كەزدەسۋٸ. وعان بۇرىنعى اقش پرەزيدەنتٸ ريچارد نيكسوننىڭ تۇسىندا ۇلتتىق قاۋٸپسٸزدٸك بويىنشا كەڭەسشٸ, مەملەكەتتٸك حاتشى بولعان ەيگٸلٸ ديپلومات گەنري كيسسيندجەر, اقش-تاعى رەسەي ەلشٸسٸ سەرگەي كيسلياك قاتىسقان.

لاۆروۆپەن ٶتكٸزگەن كەلٸسسٶزدەن كەيٸن ترامپ كەزدەسۋ "ٶتە جاقسى" ٶتكەنٸن ايتىپ, "سيريياداعى سۇمدىق قىرىپ-جويۋعا توقتاۋ سالىنۋى تيٸس, بارلىعى وسى باعىتتا جۇمىس ٸستەپ جاتىر" دەپ مەلٸمدەگەن.

اق ٷي باسپاسٶز قۇرالدارىنا ارنايى تاراتقان حابارلامادا اقش پرەزيدەنتٸنٸڭ سيريياداعى جانجالدى توقتاتۋ ٷشٸن بٸرلەسٸپ جۇمىس ٸستەۋ قاجەتتٸگٸن اتاپ ٶتكەنٸ ايتىلعان. ترامپ باشار اساد رەجيمٸن, يران مەن مەسكەۋدٸڭ وداقتاستارىن تەجەۋ قاجەتتٸگٸن ايتقان. سونىمەن بٸرگە ول ٶز ەكٸمشٸلٸگٸ شىعىس ۋكرايناداعى وسى ۋاقىتقا دەيٸن 9,9 مىڭنان استام ادامنىڭ ٶمٸرٸن قيعان قارۋلى جانجالدى شەشۋگە قاتىسۋعا بەيٸل ەكەنٸن, مينسك كەلٸسٸمدەرٸن تولىق كٶلەمدە جٷزەگە اسىرۋعا رەسەيگە جاۋاپكەرشٸلٸك جٷكتەلەتٸنٸن مەلٸمدەگەن. بۇدان ٶزگە ترامپ تاياۋ شىعىس پەن باسقا دا جەرلەردەگٸ جانجالداردى شەشۋگە قاتىستى ەرٸپتەستٸكتٸ كەڭەيتۋ مٷمكٸندٸگٸ تۋرالى مەسەلەنٸ دە قوزعاعان. اقش پرەزيدەنتٸ ٶز ەلٸ مەن رەسەي اراسىندا قارىم-قاتىناستاردى ودان ارى جاقسارتۋعا نيەتتٸ ەكەنٸن ايتقان.

ترامپپەن كەزدەسۋدەن كەيٸن ۆاشينگتوندا باسپاسٶز مەسليحاتىن ٶتكٸزگەن سەرگەي لاۆروۆ رەسەي مەن اقش سيرييادا قاۋٸپسٸز اۋماقتار قۇرۋ بويىنشا ىنتىماقتاستىققا ەزٸر دەپ مەلٸمدەگەن. ونىڭ ايتۋىنشا, ٶزارا ٸس-قيمىلدىڭ ناقتى تەتٸكتەرٸ اقش تاراپىمەن كەلٸسسٶزدەر اياسىندا تالقىلانعان.

رەسەي سىرتقى ٸستەر مينيسترٸ تەرروريزمدٸ جويۋ قاجەتتٸگٸن اتاپ ٶتكەن. سيرييا داعدارىسىن رەتتەۋگە قاتىستى سٶزٸندە لاۆروۆ "اق ٷيدەگٸ كەزدەسۋ كەزٸندە پرەزيدەنت ترامپتىڭ اقش ٷشٸن سيرييا مەسەلەسٸندە تەرروريزمدٸ جەڭۋ باسىمدىق ەكەنٸن" ايتقانىن جۋرناليستەرگە جەتكٸزگەن. "بٸز بۇعان تولىق قوسىلامىز" دەگەن لاۆروۆ.

اۋعانستانداعى جاعدايعا قاتىستى پٸكٸرٸندە لاۆروۆ "تاليبان" قوزعالىسىنا رەسەي جەردەم بەرگەن دەگەن حابارلاردى جوققى شىعارعان. سونىمەن بٸرگە ول اۋعانستانداعى جاعدايدى قالىپقا كەلتٸرۋدٸ كٶزدەيتٸن سول ەلدەگٸ بارلىق كٷشتەردٸڭ ىنتىماقتاستىعى قاجەت بولاتىنىن ايتقان.

لاۆروۆتىڭ سٶزٸنشە, ترامپپەن كەزدەسۋدە رەسەيگە سالىنعان سانكتسييالار مەسەلەسٸ دە, "رەسەيدٸڭ اقش-تاعى سايلاۋعا ارالاسۋى" تاقىرىبى دا قوزعالماعان.

"قازٸر بٸزدٸڭ ديالوگ وباما ەكٸمشٸلٸگٸنە تەن بولعان يدەولوگييالاندىرۋدان ادا. ترامپ ەكٸمشٸلٸگٸ – پرەزيدەنتتٸڭ ٶزٸ دە, مەملەكەتتٸك حاتشى دا - ٸستٸڭ ادامدارى ەكەنٸنە كٶزٸم جەتتٸ" دەپ مەلٸمدەگەن رەسەي سىرتقى ٸستەر مينيسترٸ.

لاۆروۆ اقش پرەزيدەنتٸ دونالد ترامپ پەن رەسەي پرەزيدەنتٸ ۆلاديمير پۋتين شٸلدە ايىندا گەرمانييادا ٶتەتٸن ٷلكەن جيىرمالىق سامميتٸنە كەزدەسۋگە ۋاعدالاسقانىن حابارلاعان.

رەسەي سىرتقى ٸستەر مينيسترٸمەن ۆاشينگتوندا كەزدەسۋدەن بٸر كٷن بۇرىن اقش پرەزيدەنتٸ ەلدٸڭ فەدەرالدىق تەرگەۋ بيۋروسىنىڭ (FBI) باسشىسى دجەيمس كوميدٸ قىزمەتٸنەن الىپ تاستاعان. ٶتكەن جىلعى اقش پرەزيدەنتٸ سايلاۋى كەزٸندە ترامپتىڭ سايلاۋ شتابى مٷشەلەرٸنٸڭ رەسەيمەن بايلانىسىنىڭ بار-جوعىنا تەكسەرۋ جٷرگٸزٸپ جاتقان مەكەمە باسشىسىن وتستاۆكاعا جٸبەرگەن پرەزيدەنت ترامپتىڭ شەشٸمٸن كونگرەستەگٸ دەموكراتتار سىنعا العان.

اق ٷيدەگٸ كەزدەسۋگە دەيٸن رەسەي سىرتقى ٸستەر مينيسترٸ سەرگەي لاۆروۆ ۆاشينگتوندا اقش مەملەكەتتٸك حاتشىسى رەكس تيللەرسونمەن دە جٷزدەسكەن. تيللەرسون مەن لاۆروۆتىڭ مامىردىڭ 10-ى كٷنگٸ كەزدەسۋٸنەن كەيٸن اقش مەملەكەتتٸك دەپارتامەنتٸ تاراتقان مەلٸمدەمەدە تيللەرسون رەسەيلٸك ەرٸپتەسٸنە ۋكرايناداعى جانجالدى رەتتەۋگە قاتىستى مينسك كەلٸسٸمٸن تولىق جٷزەگە اسىرۋ قاجەتتٸگٸن ايتىپ, «مەسكەۋ رەسەيگە سانكتسييالار سالۋعا سەبەپ بولعان ٸس-ەرەكەتتەرٸن دوعارمايىنشا ولاردىڭ كٷشٸندە قالاتىنىن» جەتكٸزگەنٸ ايتىلعان.