19 mamyrda AQSh prezidenti Donald Tramp koronavirýstan saqtaný úshin bezgek dárisin iship júrgenin jariialady. Azyq-túlik pen meditsina preparattarynyń qaýipsizdigin baqylaý jónindegi federaldy basqarma ótken aida bul dári aýrýhanada emdelip jatqan adamǵa ǵana qoldanylýy múmkin ekenin eskertken.
Baspasóz brifingi kezinde prezident Tramp bir aptadan beri gidoksihlorohin men quramynda myryshy bar qospa qabyldap júrgenin aitqan. Prezident sózine qaraǵanda, dáriger bul preparatty qabyldaýǵa keńes bermegen, degenmen Aq úi dárigerinen retsept jazyp berýdi suraǵan.
Aq úi dárigeri Shon Konlidiń resmi málimdemesine qaraǵanda, olar preparattyń artyqshylyǵy men kemshiligin talqylap, "paidasy kóbirek" degen sheshimge kelgen.
Prezident Tramp bul preparattyń tiimdiligi tájiribe júzinde rastalmasa da, ony koronavirýsqa qarsy tiimdi dári dep sanaitynyn birneshe ret aitqan.
- Gidroksihlorohinniń kornavirýstan saqtaitynyna, ia ony emdeitinine eshbir dálel joq, – deidi Amerika meditsina assotsiatsiiasynyń prezidenti Petri Harris Associated Press agenttigine bergen suqbatynda. Onyń sózinshe, zertteýdiń bastapqy nátijeleri úlken úmit kúterliktei emes jáne bul preparattyń organizmge qaýipti janama áseri kóp bolýy múmkin.
Ókilder palatasynyń spikeri Nensi Pelosi "jasy men "salmaq sanatyn" eskere otyryp, prezident ǵalymdar quptamaǵan preperatty qabyldamaǵany jón bolatynyn" málimdedi.
Mamyr aiynyń bas kezinde Aq úidiń eki qyzmetkerinen COVID-19 áserine jetkizetin koronavirýs anyqtalǵan. Sodan beri prezident pen vitse-prezidentke virýs juqtyrýdan saqtanyp, ishinara oqshaýlaý sharalary qoldanylǵan. Aq úide jumys isteitin ákimshilik qyzmetkerlerin meditsinalyq maska taǵýǵa mindettep, prezident, vitse-prezident pen olardyń kómekshilerin kún saiyn kornavirýs testinen ótkizetin bolǵan.
