AQSh prezidenti Donald Tramp Iran tarapynan qater kúsheise, Vashington Taiaý Shyǵysqa 120 myń ásker jiberýi múmkin dep jazǵan The New York Times gazetiniń habaryn joqqa shyǵardy. Tramp basylym materialyn "feik" dep atap, "mundai áreket josparda joǵyn, ásker jiberý qajet bolmas dep úmitenetinin" aitqan.
"Biraq [ásker jiberý] qajettigi týsa, gazet maqalasynda aitylǵan 120 myń sarbazdan áldeqaida kóp áskeri jiberemiz" dedi prezident.
14 mamyrda The New York Times gazeti AQSh qorǵanys ministrliginiń "Iran iadrolyq qarýyn ázirleýdi jedeldetse", Taiaý Shyǵysqa 120 myń áskeri jiberýdi usynǵanyn jazǵan. Basylym mundai usynysty AQSh qorǵanys ministriniń mindetin atqarýshy Patrik Shenahen aitqan dep habarlady. Taiaý Shyǵystaǵy AQSh kúshteriniń kóbeiýin qoldaǵandardyń biri AQSh prezidentiniń ulttyq qaýipsizdik jónindegi keńesshisi Djon Bolton ekeni aitylady.
Gazettiń jazýynsha, áńgime Iran aýmaǵyndaǵy operatsiia týraly emes. "Iranda operatsiia júrgizýge budan áldeqaida kóp áskeri qajet bolar edi" deidi gazettiń derekkózi.
Biyl mamyrdyń basynda Iran men AQSh arasy shielenise túsken. 8 mamyrda AQSh Iranǵa jańa sanktsiialar salǵan. Qujatta "Vashingtonnyń kózdegeni – kirisin iadrolyq baǵdarlamasyn qarjylandyrýǵa jumsaýy yqtimal Tegerandy tabysynan aiyrý" dep jazylǵan.
AQSh-tyń sanktsiia salýyna Iran biliginiń iadrolyq kelisim mindettemeleriniń keibirin oryndaýdan bas tartýy sebep bolǵan. Tegeran "Eýropa odaǵy elderi 60 kúnnen soń Irannyń munai men bank salasyn [AQSh sanktsiialarynan] qorǵaýdyń amalyn tappasa", Iran iadrolyq kelisimdegi taǵy biraz talapty oryndaýdan "bas tartady" dep eskertken.
Iran iadrolyq baǵdarlamasyn japsa, onyń óteýi retinde Tegeranǵa qarsy halyqaralyq sanktsiialar azaiady degen ýádemen taraptar 2015 jyly kelisimge qol qoiǵan. Biraq 2018 jyly AQSh Irandy " qujat talaptaryn buzdy" dep aiyptap, kelisimnen shyǵyp ketti.
