19 mamyrda AQSh Prezidenti Donald Tramp Iranǵa soǵys ashpaýdy qatań eskertti. Tramp óziniń Twitter paraqshasyna "Iran soǵysqysy kelse, óz túbine ózi jetedi. Budan bylai AQSh-qa qoqan-loqqy kórsetýshi bolmańdar!" dep jazdy Tramp Tegeranǵa qarata.
AQSh-tyń málimdeýinshe, Tegeran Parsy shyǵanaǵynda qaiyqtarǵa zymyrandaryn ornalastyryp, Birikken Arab Ámirlikteriniń jaǵalaýynda tórt kemeni atqylaǵan. Iran muny joqqa shyǵardy.
Mundai jazba jariialamastan birer kún buryn Tramp AQSh-tyń Iranǵa qysymy daýǵa ulasyp ketkenin qalamaitynyn aitqan. 16 mamyrda prezident "AQSh soǵysqa daiyndalyp jatyr ma?" degen jýrnalister suraǵyna "Daiyndalyp jatqan joq dep úmittenemin" dep jaýap bergen. Tegeran da Iran biliginiń "soǵysty qalamaitynyn" aitqan.
Eki apta buryn Vashington Parsy shyǵanaǵyna "Avraam Linkoln" ushaq tasyǵyshyn qondyrǵan. AQSh Iranǵa qarsy 120 myń áskeri jibergeli jatqany jaily da habar tarady. Biraq Tramp muny joqqa shyǵaryp, "Sarbaz jiberý ázirge josparda joq, biraq qajet bolsa, munan kóp áskeri jiberemiz" degen. Artynsha Vashington AQSh-tyń Iraktaǵy elshiliginde isteitin qyzmetkerleriniń basym bóligin "Iran qaterinen soń qaýipsizdik maqsatynda" evakýatsiialady.
Vashington men Tegeran arasyndaǵy bul daý Iran ótken aptada 2015 jylǵy iadrolyq kelisim talaptarynyń keibirin oryndaýdan bas tartyp, iadrolyq qarý daiyndaýǵa qajet baiytylǵan ýrandy qaita óndire bastaitynyn aitqan soń týǵan. Iadrolyq kelisim aiasynda AQSh Iranǵa sanktsiiasyn azaityp, esesine Tegeran iadrolyq baǵdarlamasynan bas tartýy kerek edi. Biraq Vashington "Iran talaptardy buzdy" dep byltyr bul kelisimnen shyǵyp ketti. Artynsha Tramp Tegeranǵa sanktsiiany qaita kúsheitken.
