AQSh prezidenti Donal Tramp 4 jeltoqsanǵa josparlanǵan impichment boiynsha tyńdaýǵa qatyspaidy. Aq úidiń zań boiynsha keńesshisi Pet Chippollone Tramptyń tyńdaýǵa kelmeitini týraly hatty Kongress ókilderiniń sot komitetiniń tóraǵasy Djerrorld Nadlerge joldaǵan. Bul týraly CNN habarlady.
"Kýágerlerdiń aty atalmaiynsha, sot komiteti prezidentke qosymsha tyńdaý uiymdastyryp, ádil protsess ótkizýdi qamtamasyz etpeiinshe biz tyńdaýǵa qatysa almaimyz" dep jazylǵan hatta.
Chippollone sot komitetiniń otyrysy ótetin kúni Tramp Londondaǵy NATO jiynynda júretinin aityp, demokrattar "Tramptyń saparyn bile tura tyńdaýdy ádeii osy kúnge qoidy" dep synady.
AQSh-ta impichment daýy Tramptyń 25 shildede Ýkraina prezidenti Vladimir Zelenskiimen bolǵan áńgimesinen soń týǵan. Amerikalyq basylymdar Tramptyń Zelenskiidi 2020 jylǵy sailaýda óziniń bas qarsylasy bolatyn Djo Baidenniń ústinen jemqorlyq daýy boiynsha is qozǵaýǵa májbúrlemek bolǵanyn jazdy. Synshylar Tramp "qyzmettik ókiletin asyra paidalanyp, yqtimal qarsylasyna kompromat tabýǵa tyrysty" dep aiyptady. Donald Tramp bul aiyptaýlardy joqqa shyǵardy.
Tramp pen Zelenskii arasyndaǵy áńgime belgili bolǵannan keiin AQSh ókilder palatasyndaǵy demokrattar Trampqa "bergen sertin buzǵany úshin" impichment jariialaý protsesin bastaǵan. Buǵan deiin Ýkraina prezidenti Vladimir Zelenskii Tramptyń qysym jasamaǵanyn aitqan.
4 jeltoqsandaǵy tyńdaýda Trampqa impichment jariialaýǵa zańdyq negiz bar-joǵy talqylanady. Kongrestegi tyńdaýǵa konstitýtsiialyq quqyq boiynsha zańgerler men sarapshylar shaqyrylǵan.
