اقش پرەزيدەنتٸ دونال ترامپ 4 جەلتوقسانعا جوسپارلانعان يمپيچمەنت بويىنشا تىڭداۋعا قاتىسپايدى. اق ٷيدٸڭ زاڭ بويىنشا كەڭەسشٸسٸ پەت چيپپوللونە ترامپتىڭ تىڭداۋعا كەلمەيتٸنٸ تۋرالى حاتتى كونگرەسس ٶكٸلدەرٸنٸڭ سوت كوميتەتٸنٸڭ تٶراعاسى دجەررورلد نادلەرگە جولداعان. بۇل تۋرالى CNN حابارلادى.
"كۋەگەرلەردٸڭ اتى اتالمايىنشا, سوت كوميتەتٸ پرەزيدەنتكە قوسىمشا تىڭداۋ ۇيىمداستىرىپ, ەدٸل پروتسەسس ٶتكٸزۋدٸ قامتاماسىز ەتپەيٸنشە بٸز تىڭداۋعا قاتىسا المايمىز" دەپ جازىلعان حاتتا.
چيپپوللونە سوت كوميتەتٸنٸڭ وتىرىسى ٶتەتٸن كٷنٸ ترامپ لوندونداعى ناتو جيىنىندا جٷرەتٸنٸن ايتىپ, دەموكراتتار "ترامپتىڭ ساپارىن بٸلە تۇرا تىڭداۋدى ەدەيٸ وسى كٷنگە قويدى" دەپ سىنادى.
اقش-تا يمپيچمەنت داۋى ترامپتىڭ 25 شٸلدەدە ۋكراينا پرەزيدەنتٸ ۆلاديمير زەلەنسكييمەن بولعان ەڭگٸمەسٸنەن سوڭ تۋعان. امەريكالىق باسىلىمدار ترامپتىڭ زەلەنسكييدٸ 2020 جىلعى سايلاۋدا ٶزٸنٸڭ باس قارسىلاسى بولاتىن دجو بايدەننٸڭ ٷستٸنەن جەمقورلىق داۋى بويىنشا ٸس قوزعاۋعا مەجبٷرلەمەك بولعانىن جازدى. سىنشىلار ترامپ "قىزمەتتٸك ٶكٸلەتٸن اسىرا پايدالانىپ, ىقتيمال قارسىلاسىنا كومپرومات تابۋعا تىرىستى" دەپ ايىپتادى. دونالد ترامپ بۇل ايىپتاۋلاردى جوققا شىعاردى.
ترامپ پەن زەلەنسكيي اراسىنداعى ەڭگٸمە بەلگٸلٸ بولعاننان كەيٸن اقش ٶكٸلدەر پالاتاسىنداعى دەموكراتتار ترامپقا "بەرگەن سەرتٸن بۇزعانى ٷشٸن" يمپيچمەنت جارييالاۋ پروتسەسٸن باستاعان. بۇعان دەيٸن ۋكراينا پرەزيدەنتٸ ۆلاديمير زەلەنسكيي ترامپتىڭ قىسىم جاساماعانىن ايتقان.
4 جەلتوقسانداعى تىڭداۋدا ترامپقا يمپيچمەنت جارييالاۋعا زاڭدىق نەگٸز بار-جوعى تالقىلانادى. كونگرەستەگٸ تىڭداۋعا كونستيتۋتسييالىق قۇقىق بويىنشا زاڭگەرلەر مەن ساراپشىلار شاقىرىلعان.
