AQSh Prezidenti Donald Tramp maýsym aiynda Japoniiada ótetin "Úlken jiyrmalyq" (G20) elderiniń sammiti kezinde Resei prezidenti Vladimir Pýtinmen kezdesetinin aitty. Tramp mundai málimdemeni 13 mamyr kúni jýrnalistermen kezdesýi kezinde jasady.
Biraq Kremldiń baspasóz hatshysy Dmitrii Peskovtiń sózinshe, Vashington Tramp pen Pýtin kezdesýin uiymdastyrýdy suramaǵan. "Eshqandai suranys kelip túspedi. Áli eshbir kelisim jasalǵan joq" dedi Peskov.
Buǵan deiin reseilik "Kommersant" gazeti AQSh memlekettik departamentiniń atyn atamaǵan sheneýnigine silteme jasap, Aq úidiń Pýtin men Tramp kezdesýin surap, Kremlge qaiyrylǵanyn habarlaǵan. Mamyrdyń basynda eki el prezidenti telefonmen sóilesip, Venesýela, Ýkraina jáne Irandaǵy ahýaldy jáne Reseidiń AQSh sailaýyna yqtimal kiligýin tergegen Robert Miýllerdiń zertteý qorytyndysyn talqylaǵan.
Buǵan qosa Tramp sammit kezinde Qytai basshysy Si Tszinpinmen kezdesetinin aitty. Eki el arasynda byltyrdan beri "saýda soǵysy" júrip jatyr. Biyl mamyrda Pekin men Vashington mámilege kelýi tiis edi, biraq birer kún buryn Tramp Qytai sheneýnikterin "kelisim talaptaryn buzdy" dep aiyptap, salyqty taǵy ósirdi. Qytai da osyǵan bara-bar jaýap sharasyn jasap, Amerika taýarlaryna jańa baj salyǵyn engizdi.
