AQSh prezidenti Donald Tramp 8 qańtar kúni eldiń jańa sailanǵan prezidenti Djo Baidenniń inaýgýratsiiasyna qatyspaitynyn aitty.
"Surap otyrǵandardyń bárine aitarym, men 20 qańtardaǵy inaýgýratsiiaǵa barmaimyn" dep jazdy Tramp Twitter-akkaýntynda.
AQSh-ta prezidenttiń aýysýy biyl erekshe jaǵdaida ótip jatyr. Tramp qarashadaǵy prezident sailaýynda Baidenge jeńilgenin moiyndamai, birneshe shtatta daýysty qaita sanaýdy talap etip sotqa júgindi, tipti Joǵarǵy sotqa da shaǵymdandy. Onyń bári Tramp komandasy úshin sátsiz aiaqtaldy, shtattar sailaý nátijesin rastady, Joǵary sot shaǵymdardy qanaǵattandyrmady. 3 qańtar kúni Tramptyń Djordjiia shtatynyń hatshysy Bred Raffenspergerge soqqan qońyraýynda onyń shtattaǵy sailaýdy ótkizýge jaýapty eń joǵary laýazymdy tulǵaǵa qysym kórsetkeni áshkere boldy.
Al 6 qańtar kúni Kongrestiń prezident sailaýy nátijesin bekitýi tiis ortaq jiyny bastalǵanda Tramptyń ashýly jaqtastary kongresmender otyratyn Kapitolii ǵimaratyna basyp kirip, jiyndy buzdy. Munyń aldynda Tramp Aq úi aldynda jaqtastarymen miting ótkizgen. Endi demokrattar men kei respýblikashyldar Trampty jaqtastaryn zorlyq áreketin jasaýǵa arandatty dep aiyptap otyr.
Partiialastarynyń jáne ózge de taraptardyń talabynan soń Tramp bilik aýysýy "qalypty tártipte" ótetinin málimdegen.
Tramp sailaý nátijesin moiyndamaitynyn aitqanymen, onyń óz ákimshiligi sailaý ádiletti ótti deidi. Al vitse-prezident Maik Pens inaýgýratsiiaǵa qatysqaly otyr.
AQSh-tyń jańa sailanǵan prezidenti Djo Baiden qyzmetine 20 qańtar kúngi inaýgýratsiiadan keiin kirisedi.
Donald Tramp prezidenttiginiń sońǵy saǵattaryn qalai ótkizetini týraly eshqandai málimdeme jasamady. Reuters agenttigi óziniń derekkózine siltei otyryp, qyzmetiniń sońǵy kúni Tramptyń Florida shtatyna saiahattaǵaly otyrǵanyn habarlady.
Tramp AQSh-tyń 1869 jyldan bergi tarihynda ózinen keiingi prezidenttiń ant berý rásimine qatyspaǵan alǵashqy prezident bolmaq. 1869 jyly prezident Endriý Djonson prezident Ýliss S. Granttyń inaýgýratsiiasyna barmaǵan.
Osyǵan deiin qyzmetinen ketip jatqan jáne qyzmetke endi kelip jatqan prezidentter Kapitoliidegi rásimge birge baratyn. Bul biliktiń beibit jolmen aýysyp jatqanynyń belgisi bolatyn.
6 qańtar kúngi oqiǵa saldarynan barlyǵy bes adam qaza tapty. Sonyń biri politsiia qyzmetkeri. Kongress jiyny birneshe saǵattyq úzilisten keiin qaita jalǵasty, Baidenniń prezidenttigin bekitip berdi.
