AQSh prezidenti Donald Tramp "soǵysty toqtatý úshin" Irannyń áskeri qolbasshysy Kasem Sýleimanige shabýyl jasaýǵa buiryq bergenin málimdedi. Onyń aitýynsha, general Baǵdatta AQSh pen onyń odaqtastaryna qarsy "qaterli" shabýyldar uiymdastyrǵan.
"Biz soǵys bastaý úshin emes, soǵysty toqtatý úshin shara qoldandyq" dedi Tramp 3 qańtarda Florida shtatynda ótken baspasóz jiynynda.
Baǵdat áýejaiyndaǵy shabýyldan keiin shamamen bir táýlik ótken soń Iran qoldaityn qarýly toptarǵa shabýyl jasalǵany týraly habar tarady. Odan keminde bes adam qaza tapqan. Jańa shabýyl týraly aqparat birden rastalǵan joq. Ony naqty kim jasaǵany ázirge belgisiz.
Iran Islam revoliýtsiiasy saqshylar korpýsynyń elitalyq jasaǵyn basqarǵan irandyq general Kasem Sýleimani 3 qańtarda Baǵdat áýejaiynda dronmen jasalǵan shabýyl kezinde qaza tapqan edi. Pentagon bul AQSh prezidenti Donald Tramptyń buiryǵymen jasalǵan áskeri operatsiia ekenin aitty. Prezidenttiń jaqtastary Tramptyń sheshimin joǵary baǵalady, al synshylar alańdaýshylyq bildirdi. Halyqaralyq qaýymdastyq taraptardy jaǵdaidy ýshyqtyrmaýǵa shaqyrdy.
3 qańtarda Iran BUU-nyń bas hatshysy men Qaýipsizdik keńesine hat joldap, halyqaralyq quqyqqa sáikes, adam ólimine jaýap retinde Tegerannyń "qajetti sharalardy qoldanýyna quqyǵy bar" dep eskertken.
