اقش پرەزيدەنتٸ دونالد ترامپ "سوعىستى توقتاتۋ ٷشٸن" يراننىڭ ەسكەري قولباسشىسى كاسەم سۋلەيمانيگە شابۋىل جاساۋعا بۇيرىق بەرگەنٸن مەلٸمدەدٸ. ونىڭ ايتۋىنشا, گەنەرال باعداتتا اقش پەن ونىڭ وداقتاستارىنا قارسى "قاتەرلٸ" شابۋىلدار ۇيىمداستىرعان.
"بٸز سوعىس باستاۋ ٷشٸن ەمەس, سوعىستى توقتاتۋ ٷشٸن شارا قولداندىق" دەدٸ ترامپ 3 قاڭتاردا فلوريدا شتاتىندا ٶتكەن باسپاسٶز جيىنىندا.
باعدات ەۋەجايىنداعى شابۋىلدان كەيٸن شامامەن بٸر تەۋلٸك ٶتكەن سوڭ يران قولدايتىن قارۋلى توپتارعا شابۋىل جاسالعانى تۋرالى حابار تارادى. ودان كەمٸندە بەس ادام قازا تاپقان. جاڭا شابۋىل تۋرالى اقپارات بٸردەن راستالعان جوق. ونى ناقتى كٸم جاساعانى ەزٸرگە بەلگٸسٸز.
يران يسلام رەۆوليۋتسيياسى ساقشىلار كورپۋسىنىڭ ەليتالىق جاساعىن باسقارعان يراندىق گەنەرال كاسەم سۋلەيماني 3 قاڭتاردا باعدات ەۋەجايىندا درونمەن جاسالعان شابۋىل كەزٸندە قازا تاپقان ەدٸ. پەنتاگون بۇل اقش پرەزيدەنتٸ دونالد ترامپتىڭ بۇيرىعىمەن جاسالعان ەسكەري وپەراتسييا ەكەنٸن ايتتى. پرەزيدەنتتٸڭ جاقتاستارى ترامپتىڭ شەشٸمٸن جوعارى باعالادى, ال سىنشىلار الاڭداۋشىلىق بٸلدٸردٸ. حالىقارالىق قاۋىمداستىق تاراپتاردى جاعدايدى ۋشىقتىرماۋعا شاقىردى.
3 قاڭتاردا يران بۇۇ-نىڭ باس حاتشىسى مەن قاۋٸپسٸزدٸك كەڭەسٸنە حات جولداپ, حالىقارالىق قۇقىققا سەيكەس, ادام ٶلٸمٸنە جاۋاپ رەتٸندە تەگەراننىڭ "قاجەتتٸ شارالاردى قولدانۋىنا قۇقىعى بار" دەپ ەسكەرتكەن.
