Búgin AQSh-ta jańa sailanǵan prezident Donald Trampty ulyqtaý rásimi ótti. Bul saltanatty sharaǵa myńdaǵan adam qatysty.
AQSh-tyń jańa prezidenti Donald Tramp ózi úshin eń mańyzdy saiasi basymdylyq Amerika ekenin málimdedi. Vashingtonda ótken ulyqtaý rásimindegi sózinde Tramp barlyq sheshimderin, onyń ishinde syrtqy saiasattaǵy is-qimyldaryn osyndai ustanymǵa negizdeitinin aitty.
Ol amerikalyqtar úshin jumys oryndaryn ashyp, shekarany nyǵaitýǵa ýáde berdi.
Halyqaralyq máselelerge kelgende Tramp búkil álemdi "islamshyl terrorizmge" qarsy jumyldyratynyn, burynǵy odaqtardy reformalap, jańalaryn quratynyn eskertti.
"Áreket qylatyn mezgil týdy, bos áńgimeniń zamany ótti" dedi ol.
Sál burynyraq, inaýgýratsiiasy bastalar qarsańda Donald Tramp Vashingtondaǵy Áýlie Ioan shirkeýine kirip shyqqan.
Ol buǵan deiin Arlington ziratyndaǵy Belgisiz soldat qabirine gúl shoǵyn qoiyp, Vashingtonnyń ortalyǵyndaǵy merekelik kontsertke barǵan. "Biz Amerikany biriktirip, ony qaitadan uly el jasaǵymyz keledi" degen kontsertte sóilegen Tramp.
Donald Tramptyń inaýgýratsiiasyna qyzmetinen ketip bara jatqan prezident Barak Obama men vitse-prezident Djo Baiden otbasymen qatysty. Saltanatty sharaǵa AQSh-tyń burynǵy prezidentteri Djimmi Karter, kishi Djordj Býsh shaqyrylǵan. Ulyqtaý rásiminde Bill Klinton men onyń jubaiy - prezident sailaýynda Trampqa básekeles bolǵan Hillari Klinton da tóbe kórsetti.
Ulyqtaý rásimi aldynda Donald Tramp jubaiy Melaniamen Aq úide merzimi aiaqtalǵan prezident Barak Obamamen jáne birinshi hanym Mishel Obamamen kezdesip, dastarhannan dám aýyz tidi. Bul qyzmetine kirisetin jáne tapsyryp beretin prezidentterdiń dástúri. Budan soń erli-zaiypty Tramp pen Obamalar Kongress ǵimaratyna bet aldy.
Resmi sharaǵa Kongress músheleri qatysty, biraq Ókilder palatasyndaǵy demokrattardyń úshten biri inaýgýratsiiaǵa boikot jariialaǵan.
Donald Tramp AQSh prezidenti qyzmetine kiriser aldynda ant berip tur. Vashington, 20 qańtar 2017 jyl
Dástúrge sáikes inaýgýratsiia kezinde Donald Tramp AQSh-tyń 45-prezidenti retinde tórt jyldyq qyzmetine kiriser aldynda ant berdi. Antty AQSh-tyń Joǵarǵy sot tóraǵasy Djon Roberts qabyldady.
Áýeli ant berý rásiminen jańa sailanǵan vitse-prezident Maik Pens ótti. Vitse-prezidentter 1937 jyldan beri prezidenttermen birge ant beredi. Konstitýtsiiaǵa sáikes vitse-prezident shartty túrde sheshýshi daýysqa ie Senat basshysy bolyp sanalady.
Inaýgýratsiia kóbine naýryz aiynda ótip kelgen. Franklin Rýzvelttiń kezinde ókiletti tapsyrý protsesi tym sozylyp ketpeýi úshin bul rásimdi tezirek ótkizý týraly sheshim qabyldanǵan.
Donald Tramp — AQSh tarihyndaǵy prezidentke ainalǵan alǵashqy millarder kásipker. Reuters agenttiginiń habarlaýynsha, inaýgýratsiiadan keiingi alǵashqy jumys kúni, senbide Tramp TsRÝ-diń bas keńsesine kirip shyǵady. Buǵan deiin ol AQSh-tyń barlaý qyzmetterin birneshe márte synaǵan.
Inaýgýratsiiaǵa orai Vashingtonǵa 900 myńǵa jýyq adam jinalady dep boljanǵan. AQSh astanasynda qaýipsizdik sharalary qatty kúsheitilip, 28 myńǵa tarta politsiia qyzmetkeri kósheler men joldarǵa qorshaýlar men blokposttar qoidy, ortalyq alańda qum tiegen júk kólikteri turdy.
AQSh-tyń jańa sailanǵan prezidenti Donald Tramp pen zaiyby Melania (ortadaǵy jup) Aq úige kirip, merzimi bitken prezident Barak Obamamen jáne birinshi hanym Mishel Obamamen kezdesip tur. 20 jeltoqsan 2017 jyl.
Qańtardyń 20-synda Vashington men Niý-Iorkte jáne basqa da qalalarda Donald Trampqa qarsy jappai narazylyq sherýleri ótedi dep josparlanǵan. Narazylardyń sózinshe, bul sherý Aq Úidegi bilikke keletin jańa ákimshiliktiń eldegi sailaý quqyǵy, densaýlyq saqtaý jáne qylmystyq quqyq salalarynda júzege asyrý belgilengen reformalardan bas tartýyna, sonymen birge immigranttarǵa qarsy sharalardy kúsheitýine jol bermeý maqsatyn kózdeidi.
Aptanyń basynda Washington Post pen ABC News-tiń saýalnamasy boiynsha Tramptyń jańa sailanǵan prezident retinde respondentterdiń 40 paiyzynyń ǵana maquldaýyna ie bolǵany habarlanǵan. Bul - 1977 jylǵy Djimmi Karterdiń kezinen bergi eń tómengi kórsetkish.
Ótken aptada AQSh-tyń Ulttyq barlaý qyzmeti prezident sailaýy kezinde hakerlik shabýyldarǵa qatysty esebin jariialaǵan. Qujatta Resei prezidenti Vladimir Pýtinniń "AQSh-taǵy sailaýda Tramptyń jeńip shyǵýyna yqpal etý maqsatynda jasyryn kampaniia júrgizýge pármen bergeni" aitylady. Máskeý mundai shabýylǵa qatysy joǵyn málimdedi. Tramp pen onyń jaqtastary da baiandama qorytyndysyn joqqa shyǵardy.
Donald Tramptyń ózi buǵan deiin birneshe ret AQSh arnaiy qyzmetin synaǵan. Ol Reseimen qarym-qatynasty jaqsartýǵa shaqyryp, Barak Obamanyń Resei AQSh-ta hakerlik shabýyldar jasady degen aiyptaýdan soń Máskeýge qarsy salǵan sanktsiialaryn jeńildetý múmkindigin qarastyratynyn málimdegen. Donald Tramp "Resei AQSh-pen dostyq qarym-qatynas ornatyp, terrorizmge qarsy kúreste jáne AQSh úshin mańyzdy basqa da máselelerde járdem tanytatyn bolsa, onda Reseige qarsy kei sanktsiialardy joiý máselesin nege qarastyrmasqa" degen pikir bildirgen.
Resei 2014 jyly Qyrymdy anneksiialap, Ýkrainanyń shyǵysyndaǵy eki oblystyń birneshe aýdanyn basyp alǵan separatisterge dem bergeni úshin AQSh-pen jáne EO-men qarym-qatynasy qatty nasharlap ketken. Batys elderi Kremlge ekonomikalyq sanktsiialar salyp, Vashington men Máskeýdiń arasy "Qyrǵi-qabaq soǵys" kezindegidei sýyǵan.
Azattyq
