AQSh prezidenti Donald Tramp 15 adamǵa raqymshylyq jasady. Amnistiiaǵa ilingender arasynda 2016 jyly AQSh-taǵy prezident sailaýyna Reseidiń aralasýy týraly iste tergeý oryndaryna jalǵan aqparat berdi dep tanylyp, qysqa merzimdik túrme jazasyn alǵan eki adam bar. Tramp sonymen birge bes adamnyń jazasyn jeńildetken.
Raqymshylyqqa ilingenderdiń biri - Tramptyń sailaýaldy shtabynyń ishki saiasat jónindegi burynǵy keńesshisi Djordj Papadopýlos 2016 jylǵy sailaý kampaniiasy kezinde reseiliktermen bailanysy týraly AQSh federaldyq tergeý biýrosyna jalǵan kýálik bergeni úshin 14 táýlikke qamalǵan. Ol jazasyn 2018 jyly ótep shyqqan. Odan keiin bir jylǵa probatsiialyq baqylaýmen bostandyqqa shyqqan.
Aq úi sol kezde Papadopýlos arnaiy prokýror Robert Miýllerdiń tergeýi barysynda “jalǵan aqparat bergeni úshin” aiyptaldy dep málimdegen. Al Tramp istiń saiasi astary baryn aitqan.
"Bul raqymshylyq Miýller komandasynyń kóptegen adamǵa tigizgen kesirin jýyp-shaiýǵa kómetesedi" delingen Aq úidiń 22 jeltoqsan kúni taratqan habarlamasynda.
Tramp sonymen birge reseilik milliarder, "Alfa-Grýpp" kompaniialar tobynyń aktsioneri German Hannyń niderlandtyq kúieýbalasy 36 jastaǵy Aleks van der Zvaandy da keshirdi. Ol Tramptyń sailaýaldy shtabynyń burynǵy jetekshisi Pol Manafortqa jumys istegen. Keiinirek Miýller tergeýi kezinde Tramp shtabymen bailanysyn jasyrdy dep tanylyp, 30 kúnge qamaýǵa alynǵan, 20 myń dollar aiyppul alǵan.
Shamamen eki jylǵa jalǵasqan tergeý kezinde Robert Miýller Reseidiń Amerikadaǵy sailaýǵa hakerlik shabýyldar men áleýmettik jelide jalǵan aqparat taratý arqyly aralasqanyna dálel tapty. Alaida prokýror Tramp pen onyń jaqtastarynyń Reseimen sóz bailasqanyn aiǵaqtai almady.
AQSh-ta ókileti aiaqtalar tusta prezidentterdiń jaqyn serikteri men jaqtastaryna raqymshylyq jariialaýy jii kezdesedi. Tramp aldyńǵy prezidentterge qaraǵanda serikterine sirek raqymshylyq jasaǵan.
