Álem boiynsha 3,4 million Toyota kóligi keri qaitarylady. Sebebi qaýipsizdik júiesinde aqaý tabyldy, – dep habarlaidy Reuters.
Satylǵan kólikterdiń elektrondy basqarý blogynda aqaýdyń bar ekeni anyqtaldy. Sonyń saldarynan jol apaty kezinde qaýipsizdik jastyqshasy ashylmai qalýy nemese kenetten ashylyp ketýi múmkin. Osyǵan bailanysty Toyota milliondaǵan kólikti keri qaitarmaq.
Máselen, 2011-2019 jyldary shyǵarylǵan Corolla, 2011-2013 jyldary shyqqan Matrix jáne 2013-2018 jyldary óndirilgen Avalon men Avalon Hybrid markaly kólikter keri qaitarylady.
Aita ketsek, aqaýlyǵy bar Toyota kólikteriniń basym bóligi AQSh-ta satylǵan. Dilerlerdiń esebi boiynsha olardyń jalpy sany 2,9 millionǵa jýyq.
