Tótenshe jaǵdailar ministri Chingis Arinov eldegi sý tasqyny jaǵdaiy týraly aitty, dep habarlaidy "Ult aqparat".
"Sý tasqyny kezeńiniń ótýi meniń jeke baqylaýymda. Kesheden beri Arqalyq qalasyna jaqyn ornalasqan qystaýlardan halyqty kóshirý jalǵasýda. Jumysqa Tótenshe jaǵdailar ministrligi, Ulttyq qaýipsizdik komiteti, Qorǵanys ministrliginiń sý jáne aviatsiia tehnikasy jumyldyryldy", - dedi ministr.
Jumyldyrylǵan kúshter men quraldar Aqtóbe, Aqmola, Qostanai oblystaryndaǵy 145 jeke turǵyn úiden, sondai-aq Aqtóbe, Atyraý oblystaryndaǵy 46 aýla aýmaǵynan sý sorý jumystary júrgizýde.
Túrkistan, Aqtóbe, Qostanai, Batys Qazaqstan oblystarynyń sý basqan eldi mekenderinen 412 adam evakýatsiialandy, onyń ishinde 134 bala. Onyń 323-i Aqtóbe, Qostanai jáne Batys Qazaqstan oblystarynyń eldi mekenderiniń turǵyndary ýaqytsha ornalastyrý pýnktterinde qalady, 80-i Aqtóbe jáne Qostanai oblystarynyń turǵyndary týystarynda, 9-y Túrkistan oblysynyń turǵyndary úilerine oraldy.
TJM jáne ákimdikterdiń kúshimen 122 myńnan astam tekshe metr erigen sý soryldy, 24 myńnan astam qap jáne 47 670 tonna inertti material tóseldi.
Avariialyq-qutqarý jumystaryna TJM, jergilikti atqarýshy organdardyń, IIM, tartylǵan uiymdardyń kúshteri men quraldary: jeke quramynan 3000-nan astam adam, 1200-ge jýyq birlik tehnika, 400-ge jýyq birlik sý aidaý jáne júzý quraly, 2 áýe kemesi jumyldyryldy.
Respýblikalyq jáne oblystyq jedel shtabtar, sondai-aq «Jedel jeli» telefondary jumysyn jalǵastyrýda: TJM 8 717 2 70 41 14, Aqtóbe oblysy TJD 8 713 2 54 86 57, Batys Qazaqstan oblysy TJD 8 711 2 55 40 88, Qostanai oblysy TJD 8 714 2 50 19 60, Aqmola oblysy TJD 8 716 2 52 55 14. Ótken táýlikte 134 qońyraý tústi.
Sý tasqynyna qarsy jumystar jalǵasýda.
