Tótenshe jaǵdai kezeńinde tabysynan aiyrylǵan Qazaqstannyń jumys isteitin azamattary Memlekettik áleýmettik saqtandyrý qorynan aqshalai tólem alady. Bul týraly «Habar 24» telearnasynyń tikelei efirinen QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Keshe habarlaǵanymdai, BAQ pen azamattardyń kelip túsip jatqan saýaldardyń basym bóligi tótenshe jaǵdaidyń engizilýine bailanysty tabysynan aiyrylǵandarǵa aqshalai tólem jasaýǵa qatysty bolyp otyr. Jalaqysyz eńbek demalysyna májbúrli túrde shyǵýyna bailanysty tótenshe jaǵdai kezeńinde kirisinen aiyrylǵan Qazaqstannyń jumys isteitin azamattary Memlekettik áleýmettik saqtandyrý qorynan tólem alady. 1 jumysshyǵa áleýmettik ólemniń kólemi aiyna 1 eń tómengi jalaqyny nemese 42,5 myń teńgeni quraidy», - dedi ministr.
Onyń atap ótýinshe, Memlekettik áleýmettik saqtandyrý qorynan jańa tólem Qazaqstan aýmaǵynda jumys isteitin el azamattaryna beriledi. Tólem alýdyń arnaiy sharttary da bar. Aldymen tótenshe jaǵdaidyń jariialanýyna bailanysty jalaqysy saqtalmai demalysqa jiberilgen jumysshyǵa áleýmettik tólem beriledi. Tólem alý úshin tótenshe jaǵdai engizilgen dataǵa deiingi sońǵy 12 aidyń keminde 3 aiynda azamattary Memlekettik áleýmettik saqtandyrý qoryna jumysshy úshin aýdarym jasalýy qajet.
Áleýmettik tólem orta, shaǵyn jáne mikrobiznes jumysshylary úshin ǵana júzege asyrylady. Jańa áleýmettik tólemdi taǵaiyndaý úshin jumys berýshi jumyspen qamtý máseleleri jónindegi jergilikti organǵa júginip, tótenshe jaǵdai kezinde qyzmetiniń shektelýine bailanysty jumysshysynyń kirisinen aiyrylatynyn dáleldeitin qujat usynýy qajet.
