Jambyl oblysynda tórt temirjol qyzmetkeriniń qazasyna sebep bolǵan qaiǵyly oqiǵaǵa bailanysty úsh adamǵa sot úkimi shyǵaryldy, dep habarlaidy ult.kz.
Bas prokýratýranyń málimetinshe, qaiǵyly oqiǵa 2025 jylǵy 10 jeltoqsanda «Sheshenqara – Qarajyńǵyl» temirjol ýchaskesinde bolǵan. Jol jóndeý jumystaryn júrgizip jatqan brigadany júk poiyzy qaǵyp, saldarynan tórt adam kóz jumyp, taǵy eki jumysshy túrli jaraqat alǵan.
Prokýratýranyń málimetinshe, jóndeý jumystary temirjol qozǵalysyn ýaqytsha toqtatpai ári qajetti qaýipsizdik talaptaryn saqtamai júrgizilgen. Sondai-aq poiyz mashinisine jol boiynda adamdardyń jumys istep júrgeni týraly der kezinde habar berilmegen.
Sot sheshimimen poiyz dispetcheri 5 jylǵa bas bostandyǵynan aiyryldy. Al Saryshaǵan jol distantsiiasynyń eki qyzmetkeri 3 jyl 6 ai merzimge bas bostandyǵyn shekteý jazasyna kesildi.
Sonymen qatar, sottalǵan úsh azamattyń da temirjol kóligindegi qozǵalys qaýipsizdigin qamtamasyz etýge bailanysty laýazymdarda qyzmet atqarýyna tyiym salyndy.
