Politseiler Solsberidegi Sergei Skripal men qyzy turǵan úidi qorshap tur. Ulybritaniia, 3 sáýir 2018 jyl.
AQSh, Frantsiia, Germaniia jáne Kanada Ulybritaniianyń reseilik burynǵy agent Sergei Skripal men qyzy Iýliia Skripalge biyl naýryzda Solsberi qalasynda ý berip qastandyq jasaýǵa Reseidiń qatysy bar degen ustanymyn qoldady, dep jazady Azattyq.
Bes el basshylary birikken málimdeme jasap, Reseidi Skripaldi ýlaǵan "Novichok" ýyn jasaý tásilin jariialaýǵa shaqyrdy.
5 qyrkúiekte Tereza Mei Skripalderdi Kremldiń buiryǵymen áreket etken Resei arnaiy qyzmetiniń qyzmetkerleri ýlaǵanyn málimdegen. Ulybritaniia prokýratýrasy qastandyqqa kúdikti Aleksandr Petrov pen Rýslan Boshirovtyń sýretin jariialap, olardy Eýropa aýmaǵyna ene qalǵan jaǵdaida dereý tutqyndaýǵa order bergen.
"Britan biliginiń málimdemesi shetel barlaý qyzmetteriniń óz territoriiamyzda jaýlyq piǵyldaǵy áreketin toqtatý, himiialyq qarýǵa tyiym salý, azamattarymyzdy jáne ózimizdi bizge qarsy zymiiandyqtan qorǵaý nietimizdi bekite túsedi" delingen bes basshylarynyń málimdemesinde.
Ulybritaniia Skripal SSSR tusynda jasalǵan júikeni zaqymdaityn ýly "Novichok" zatynan ýlanǵan dep sanaidy. London "Skripal isin" tergeý aiasynda Reseidiń 23 diplomatyn elden shyǵarǵan. Máskeý buǵan jaýap retinde britandyq 23 diplomatty Reseiden shyǵaryp, Britan keńesi beisaiasi uiymynyń Reseidegi ókildigin jabý týraly sheshim qabyldaǵan. Resei biligi Skripalge qastandyq jasaýǵa qatysy baryn teristeidi.
