Mańǵystaý oblysynda tórt adamnyń ólimine ákelgen jol-kólik oqiǵasyna qatysty sot úkimi shyqty, dep habarlaidy ult.kz.
Oblystyq sottyń baspasóz qyzmetiniń málimetinshe, qaiǵyly oqiǵa biyl maýsym aiynda Aqtaý–Beineý avtojolynyń 424/362 shaqyrymynda bolǵan. Sot materialdaryna sáikes, Toyota Camry avtokóligin basqarǵan júrgizýshi jol qozǵalysy erejesin buzyp, joǵary jyldamdyqpen kele jatyp, ózimen bir baǵytta qozǵalǵan KamAZ júk kóligimen soqtyǵysqan.
Jol apaty saldarynan jeńil kólikte otyrǵan tórt jolaýshy aýyr jaraqat alyp, oqiǵa ornynda kóz jumǵan.
Sot barysynda aiyptalýshy óz kinásin tolyq moiyndap, jasaǵan isine ókinish bildirip, marqumdardyń týystarynan keshirim suraǵan. Jábirlenýshiler de oǵan qatysty materialdyq nemese moraldyq talap qoimai, keshirgenderin aityp, jeńil jaza taǵaiyndaýdy suraǵan.
Sot jaza taǵaiyndaý kezinde aiyptalýshynyń kinásin moiyndaýyn, shyn júrekten ókinýin, II toptaǵy múgedektigin jáne jábirlenýshiler tarapynan talaptardyń bolmaýyn jeńildetetin mán-jailar retinde eskerdi.
Sot úkimimen júrgizýshi 5 jylǵa bas bostandyǵynan aiyryldy. Sonymen qatar ol 7 jyl merzimge kólik quralyn basqarý quqyǵynan aiyryldy.
