Qyzylorda oblysynda «Torǵai Petroleým» AQ-nyń 416,6 mln teńgesin jymqyrý isi boiynsha sot úkimi shyqty, dep habarlaidy ult.kz.
Qyzylorda oblystyq ekonomikalyq tergep-tekserý departamentiniń málimetinshe, kompaniianyń mehanikalyq bóliminiń burynǵy basshysy «B» jáne «MANSUR-INVEST group» JShS men «KazPromStroy LTD» JShS basshysy S.Sh. aldyn ala sóz bailasqan.
Tergeý deregine sáikes, 2019-2020 jyldary kompaniiada is júzinde oryndalǵan jumystar men burynnan bar taýarlardy jeke kompaniialardan satyp alý qajet degen mazmunda qyzmettik hattar rásimdelgen. Sonyń negizinde is júzinde jetkizilmegen taýarlar, oryndalmaǵan jumystar men kórsetilmegen qyzmetter úshin alty kelisimshart jasalyp, eki kompaniianyń shotyna 416 mln 696 myń 896 teńge aýdarylǵan.
Sot materialdarynda bul qarajattyń keiin qolma-qol sheshilip, qylmysqa qatysýshylar arasynda bólingeni kórsetilgen.
Sot «B»-ny Qylmystyq kodekstiń 189-baby 4-bóliginiń 2-tarmaǵy boiynsha kináli dep tanyp, bastapqyda 7 jylǵa bas bostandyǵynan aiyrý jazasyn taǵaiyndady. Raqymshylyq týraly zańǵa sáikes jaza merzimi 5 jyl 7 ai 6 kúnge qysqartylyp, QK-niń 63-baby negizinde shartty jaza retinde belgilendi. Oǵan probatsiialyq baqylaý taǵaiyndaldy.
Al S.Sh. QK-niń 216-baby 3-bóligi, 28-baby 5-bóligi jáne 189-baby 4-bóliginiń 2-tarmaǵy boiynsha kináli dep tanyldy. Oǵan da 7 jyl bas bostandyǵynan aiyrý jazasy taǵaiyndalyp, raqymshylyqpen 5 jyl 7 ai 6 kúnge qysqartyldy. Jaza shartty dep tanylyp, probatsiialyq baqylaý belgilendi.
Sonymen birge S.Sh. materialdyq jaýapkershilikke bailanysty laýazymdardy atqarý quqyǵynan ómir boiyna aiyryldy.
