Memleket basshysy Qasym-Jomart Toqaev Qazaqstan Ulttyq bankiniń tóraǵasy Timýr Súleimenovti qabyldap, qarjy retteýshisiniń 2025 jylǵy jumysynyń qorytyndylary men 2026 jylǵa arnalǵan josparlary týraly esebin tyńdady, dep habarlaidy ult.kz.
Kezdesý barysynda Ulttyq bank basshysy aqsha-nesie saiasatynyń nátijeleri, qarjy sektorynyń ahýaly, altyn-valiýta rezervteri, Ulttyq qor men Biryńǵai jinaqtaýshy zeinetaqy qorynyń (BJZQ) aktivteri, sondai-aq qarjy júiesin tsifrlandyrý baǵytyndaǵy jumystar jóninde baiandady.
Timýr Súleimenovtiń málimetinshe, 2025 jyly infliatsiia deńgeii 12,3 paiyzǵa deiin tómendegen. Bul úrdis biyl da jalǵasyp, mamyr aiynyń qorytyndysy boiynsha infliatsiia 10,4 paiyzdy quraǵan. Qazirgi ýaqytta Ulttyq bank Úkimetpen birlesip baǵa ósimin tejeýge baǵyttalǵan keshendi sharalardy júzege asyryp jatyr.
Prezidentke Ulttyq qor men BJZQ aktivteriniń jai-kúii týraly da aqparat berildi. Byltyr Ulttyq banktiń altyn-valiýta rezervteri rekordtyq kórsetkishke jetip, 65,4 milliard dollardy quraǵan. Al Ulttyq qordyń valiýtalyq aktivteri 5,1 milliard dollarǵa ósip, 63,9 milliard dollarǵa jetken.
Sonymen qatar BJZQ aktivteri 2,7 trillion teńgege ulǵaiyp, jalpy kólemi 25,1 trillion teńgeni qurady.
Kezdesýde tsifrlyq qarjy tehnologiialaryn damytý máselesine de erekshe nazar aýdaryldy. Ulttyq bank basshysynyń aitýynsha, 2025 jyly tsifrlyq aktivterge arnalǵan arnaiy quqyqtyq rejim iske qosylyp, onyń aiasynda naqty aktivterdi tokendeý, steiblkoinder shyǵarý, kriptoprovaiderler men kripto-fiat arnalaryna qatysty 30-dan astam pilottyq joba júzege asyrylǵan.
Sondai-aq Qazaqstan óńirdegi alǵashqy Ulttyq tsifrlyq qarjy infraqurylymyn iske qosqan. Jańa júie qaýipsiz biometriiany, bankaralyq tólemderdi, qarjylyq aqparat almasýdy, tsifrlyq teńgeni, alaiaqtyqtan qorǵaý tetikterin jáne basqa da zamanaýi servisterdi biriktiredi.
Kezdesý qorytyndysynda Qasym-Jomart Toqaev Ulttyq bankke qarjy júiesiniń turaqtylyǵyn qamtamasyz etýdi, infliatsiiany tómendetý jáne makroekonomikalyq turaqtylyqty saqtaý baǵytynda Úkimetpen úilesimdi jumys júrgizýdi tapsyrdy.
Sonymen qatar Memleket basshysy qarjy naryǵyndaǵy zamanaýi tsifrlyq infraqurylymdy odan ári damytý mańyzdy ekenin atap ótti.
